क्यासिनो, बाढी राहत र विधेयक लगायत विषयमा छलफल गर्न चार संसदीय समितिको बैठक बस्दै
काठमाडौं, ३० भदौ । सङ्घीय संसद्अन्तर्गत आज चार वटा विषयगत समितिको बैठक बस्दै छ। मङ्गलबार अन्तर्राष्ट्रिय सम्बन्ध र पर्यटन समिति, शिक्षा, स्वास्थ्य तथा सूचना प्रविधि समिति, विधायन व्यवस्थापन समिति र सङ्घीयता सबलीकरण तथा राष्ट्रिय सरोकार समितिको बैठक बस्न लागेको हो।
बिहान १० बजे बस्ने अन्तर्राष्ट्रिय सम्बन्ध र पर्यटन समितिको बैठकमा ‘पर्यटन विधेयक, २०८१’ का सम्बन्धमा क्यासिनो व्यवसायीहरूसँग छलफल गर्ने कार्यसूची छ। त्यस्तै, बिहान ८ बजे बसेको शिक्षा, स्वास्थ्य तथा सूचना प्रविधि समितिको बैठकमा भोटेकोशी नदीको बाढीबाट पुगेको क्षति, उद्धार, राहत तथा पुनर्नर्मार्णबारे शिक्षा तथा खेलकुद मन्त्रालयले गरिरहेका काम र भावी रणनीतिबारे छलफल भइरहेको छ।
यसैगरी, बिहान ११ बजे विधायन व्यवस्थापन समितिको बैठक बस्दै छ। उक्त बैठकमा ‘संक्रामक पशु रोग नियन्त्रण विधेयक, २०८३’ को प्रतिवेदनमाथि छलफल हुनेछ भने दिउँसो १ बजे सोही समितिमा ‘आन्तरिक वायुसेवाको दायित्व सम्बन्धी विधेयक, २०८३’ माथि सैद्धान्तिक छलफल हुनेछ।
उता दिउँसो १:१५ बजे बस्ने सङ्घीयता सबलीकरण तथा राष्ट्रिय सरोकार समितिको बैठकमा भने समितिको वार्षिक प्रतिवेदनमाथि छलफल हुने कार्यसूची रहेको संसद् सचिवालयले जनाएको छ।
