धनकुटाको सेल्फीडाँडामा ईभी र ट्याङ्कर ठोक्किँदा दुई जना घाइते
धनकुटा । धनकुटाको साँगुरीगढी गाउँपालिका–६ सेल्फीडाँडामा ईभी गाडी र ट्याङ्कर एकआपसमा ठोक्किँदा दुई जना घाइते भएका छन्।
मंगलबार बिहान करिब ११ः३० बजे कोशी लोकमार्गमा धरानबाट तेह्रथुमतर्फ जाँदै गरेको प्र.१–०२–००१ ज ४४४१ नम्बरको ईभी गाडी र विपरीत दिशाबाट आउँदै गरेको को १ ख ७५२० नम्बरको ट्याङ्कर ठोक्किएका हुन्।
दुर्घटनामा ईभी चालक तेह्रथुम फेदाप गाउँपालिका–१ का ४२ वर्षीय संजय मास्के र ईभीमा सवार भोजपुर पौवादुम्मा गाउँपालिका–३ चम्प्तामका ३८ वर्षीय कुलप्रसाद थापा मगर घाइते भएका छन्।
मास्केको शरीरका विभिन्न भाग तथा खुट्टामा चोट लागेको छ भने थापा मगरको टाउकोमा चोट लागेको प्रहरीले जनाएको छ। दुवैको अवस्था मध्यम रहेको जिल्ला प्रहरी कार्यालय धनकुटाका प्रवक्ता प्रहरी नायव उपरीक्षक हेमन्त भण्डारी क्षेत्रीले जानकारी दिए ।
घाइते दुवैलाई उपचारका लागि बीपी कोइराला स्वास्थ्य विज्ञान प्रतिष्ठान, धरान पठाइएको छ।
दुर्घटनापछि ईभी, ट्याङ्कर र ट्याङ्कर चालकलाई इलाका प्रहरी कार्यालय भेडेटारको नियन्त्रणमा राखिएको साथै दुर्घटनाका कारण सडक अवरुद्ध नभएको प्रहरीले जनाएको छ ।
