प्रहरीका तीनवटा बेरिकेट तोडेर भागेको एम्बुलेन्सबाट १०५ किलो गाँजा बरामद
रौतहट ३१ भदौ । प्रहरीको निगरानी छल्दै तीनवटा बेरिकेट तोडेर भागेको एम्बुलेन्सबाट सिरहामा ठूलो परिमाणमा गाँजा बरामद भएको छ।
जिल्ला प्रहरी कार्यालय सिरहाका अनुसार मंगलबार राति करिब ८ बजे चोहर्वाबाट जयनगरतर्फ जाँदै गरेको ज१च १२१३ नम्बरको एम्बुलेन्समा गाँजा ओसारपसार भइरहेको सूचना प्राप्त भएको थियो।
सूचना पाएलगत्तै जिल्ला प्रहरी कार्यालय सिरहाबाट इन्स्पेक्टर सुनिल चौरसियाको कमान्डमा प्रहरी टोली परिचालन भयो। प्रहरीले एम्बुलेन्सलाई पछ्याउँदै निगरानी बढाएपछि चालकले प्रहरी टोलीको उपस्थितिबारे थाहा पाएका थिए।
प्रहरीका अनुसार चालकले चोहर्वादेखि सिरहासम्म राखिएका तीनवटा प्रहरी बेरिकेट तोड्दै एम्बुलेन्स तीव्र गतिमा भगाएका थिए। प्रहरीले थप टोली परिचालन गरी एम्बुलेन्सको पछ्याइ जारी राखेको थियो।
प्रहरीको निरन्तर दबाबपछि चालकले सिरहा नगरपालिका–१ स्थित हुलाकी सडकखण्डमा एम्बुलेन्स छाडेर फरार भएको प्रहरीले जनाएको छ।
त्यसपछि प्रहरीले एम्बुलेन्स नियन्त्रणमा लिएर खानतलासी गर्दा पाँचवटा बोरा फेला पारेको थियो। ती बोराभित्र रहेको पदार्थ तौल गर्दा १०५ किलो गाँजा रहेको पुष्टि भएको जिल्ला प्रहरी कार्यालय सिरहाले जनाएको छ।
बरामद गाँजा र एम्बुलेन्स प्रहरी कार्यालयमा ल्याइएको छ। फरार चालकको पहिचान तथा खोजी भइरहेको छ भने घटनाबारे थप अनुसन्धान भइरहेको प्रहरीले जनाएको छ।
