तीन घरमा चोरीको अनुसन्धान गर्दा लोडेड कटुवा पेस्तोल भेटियो
रौतहट, २ असोज । रौतहटको गरुडा नगरपालिका–७ भिमडावरमा लगातार तीनवटा घरमा चोरी भएको घटनाको अनुसन्धानका क्रममा प्रहरीले लोडेड कटुवा पेस्तोल बरामद गरेको छ।
शुक्रबार बिहान स्थानीय दयाराम साहको घरको पछाडिको ढोकाको आग्लो भाँचिएको अवस्थामा चोरी भएको सूचना प्रहरीलाई प्राप्त भएको थियो। चोरले घरभित्र प्रवेश गरी रेडमी, ओपो र रियलमी ब्रान्डका तीन थान मोबाइल चोरी गरेको प्रहरीको प्रारम्भिक अनुसन्धानबाट खुलेको छ।
त्यसैगरी मनोज साहको घरमा छतको ढोकाबाट प्रवेश गरी कोठाको आग्लो निकालेर दराजमा राखिएको पर्सबाट करिब ५ हजार रुपैयाँ चोरी भएको इलाका प्रहरी कार्यालय गरुडाका प्रमुख डीएसपी शंकरप्रसाद आचार्यले जानकारी दिए।
रामाज्ञा साहको घरमा पनि माथिल्लो ढोकाबाट प्रवेश गरी टिनको बाकसभित्र राखिएको पर्सबाट ८ हजार रुपैयाँ नगद र एक थान भिभो मोबाइल चोरी भएको प्रहरीले जनाएको छ।
तीनवटै घरमा चोरी भएको जानकारी पाएपछि इलाका प्रहरी कार्यालय गरुडाबाट इन्स्पेक्टर उज्ज्वल क्षेत्रीको कमाण्डमा प्रहरी टोली परिचालन गरिएको थियो।
अनुसन्धानका क्रममा दयाराम साहको खपडाको छानो भएको भुईँघरको बरण्डामा राखिएको खाटबाट एक थान लाइभ राउण्डसहित लोडेड कटुवा पेस्तोल फेला परेको प्रहरीले जनाएको छ।
बरामद हतियारसहित चोरीको घटनाबारे प्रहरीले थप अनुसन्धान अघि बढाएको छ। रौतहट प्रहरी प्रमुख एसपी सीताराम रिजालले बेवारिसे अवस्थामा रहेको जस्तो देखिने पेस्तोल बरामद भएको पुष्टि गरेका छन्।
घटनामा हालसम्म कसैलाई पक्राउ नगरिएको र बरामद हतियार तथा चोरीसम्बन्धी घटनाबारे थप अनुसन्धान भइरहेको एसपी रिजालले बताएका छन्।
