सुनसरीको धरानबाट मलद्वारमा लुकाएको ब्राउन सुगर सहित दुई जना पक्राउ
धरान, असोज ७ गते । सुनसरीको धरानबाट प्रहरीले ब्राउन सुगरसहित दुई जनालाई पक्राउ गरेको छ।
कोशी प्रदेश प्रहरी कार्यालय विराटनगर (PIT) र इलाका प्रहरी कार्यालय धरानबाट खटिएको प्रहरी टोलीले विशेष सूचनाका आधारमा असोज ६ गते प्रदेश १–०२–०५५ प ४६६ नम्बरको स्कुटरमा सवार दुई जनालाई चेकजाँच गरेको थियो।
पक्राउ पर्नेमा धरान उपमहानगरपालिका–१२ का सुनिल क्षेत्री र धरान–१९ का रुदिन भुजेल रहेका छन्। चेकजाँचका क्रममा सुनिल क्षेत्रीले मलद्वारमा लुकाएर राखेको अवस्थामा ५ ग्राम २८० मिलिग्राम ब्राउन सुगर बरामद भएको प्रहरीले जनाएको छ।
लागूऔषध बरामद भएपछि दुवै जनालाई पक्राउ गरी इलाका प्रहरी कार्यालय धरानमा राखिएको छ। घटनाबारे थप अनुसन्धान तथा आवश्यक कानुनी कारबाही भइरहेको प्रहरीले जनाएको छ।
