सोलुखुम्बुमा निजी गुम्बा र घरबाट भाँडाकुँडा चोरीमा संलग्न तीन जना पक्राउ
सोलुखुम्बु, असोज ७ गते । सोलुखुम्बुको सोलुदुधकुण्ड नगरपालिका–७ गार्मा मिन्दुपाके टोलस्थित निजी गुम्बा र घरबाट भाँडाकुँडा चोरी गरेको आरोपमा प्रहरीले तीन जनालाई पक्राउ गरेको छ।
जिल्ला प्रहरी कार्यालय सोलुखुम्बुका अनुसार पक्राउ पर्नेमा लिखुपिके गाउँपालिका–२ गोलीका २७ वर्षीय दिनेश भन्ने दावा तामाङ, सोलुदुधकुण्ड नगरपालिका–६ थातेङका ३८ वर्षीय लक्ष्मण कामी र कानूनको विवादमा परेको १७ वर्षीय बालक रहेका छन्।
उनीहरूले भदौ १ गते राति करिब १२ बजे पसी लामाको निजी गुम्बा तथा घरको ढोकाको ताल्चा फोडी काश, तामा र पित्तलका भाँडाकुँडा चोरी गरेको प्रहरीले जनाएको छ।
प्रहरीले चोरी गरिएका करिब ५० किलो काश, तामा र पित्तलका भाँडाकुँडा लुकाइछिपाइ राखेको अवस्थामा बरामद गरेको छ।
तीनै जनालाई असोज ४ गते पक्राउ गरी सोलुखुम्बु जिल्ला अदालतबाट म्याद थप गरेर घटनाबारे थप अनुसन्धान भइरहेको जिल्ला प्रहरी कार्यालय सोलुखुम्बुले जनाएको छ।
