गोरखा, बागलुङ र धादिङका विभिन्न क्षेत्र तीन महिनाका लागि विपद् संकटग्रस्त घोषणा
काठमाडौँ । सरकारले बाढी तथा पहिरोबाट प्रभावित गोरखा, बागलुङ र धादिङका विभिन्न स्थानीय तहलाई तीन महिनाका लागि विपद् संकटग्रस्त क्षेत्र घोषणा गर्ने निर्णय गरेको छ ।
आज बसेको मन्त्रिपरिषद् बैठकले बागलुङका गल्कोट नगरपालिका र ढोरपाटन नगरपालिकालाई विपद् संकटग्रस्त क्षेत्र घोषणा गर्ने निर्णय गरेको हो ।
त्यस्तै, गोरखाको चुमनुब्री गाउँपालिका, धार्चे गाउँपालिका र आरुघाट गाउँपालिका तथा धादिङको त्रिपुरासुन्दरी गाउँपालिकाका वडा नम्बर १ र २ लाई पनि विपद् संकटग्रस्त क्षेत्र घोषणा गरिएको छ ।
सञ्चारमन्त्री विक्रम तिमिल्सिनाका अनुसार २०८३ असोज ८ देखि ११ गतेसम्म भएको वर्षाका कारण आएको बाढी तथा पहिरोबाट प्रभावित क्षेत्रलाई लक्षित गरी उक्त निर्णय गरिएको हो ।
विपद् संकटग्रस्त क्षेत्र घोषणा भएपछि प्रभावित स्थानमा राहत, उद्धार, पुनःस्थापना तथा पुनर्निर्माणका काम अघि बढाउन सहज हुने सरकारले जनाएको छ ।
मन्त्री तिमिल्सिनाका अनुसार यस निर्णयले प्रक्रियागत जटिलता हटाई विपद् प्रभावित क्षेत्रमा आवश्यक काम छिटोछरितो रूपमा सञ्चालन गर्न सहयोग पुग्नेछ ।
