कारको डिकीबाट ११७ किलोभन्दा बढी गाँजा बरामद, चालक फरार
मकवानपुर, मंसिर ३। मकवानपुरमा प्रहरीले कारको डिकीबाट ११७ किलो ९१० ग्राम गाँजा बरामद गरेको छ। प्रहरीको चेकजाँचका क्रममा ठूलो परिमाणमा गाँजा फेला परे पनि कार चालक भने फरार भएका छन्।
जिल्ला मकवानपुरको भीमफेदी गाउँपालिका–२ भैँसेस्थित प्रहरी चेकपोस्टमा नियमित चेकजाँच गर्ने क्रममा उक्त गाँजा बरामद भएको हो।
प्रहरीका अनुसार गए राति करिब १:४० बजे पालुङबाट भैँसेतर्फ आउँदै गरेको बा.अ.ब. ४४३१ नम्बरको कारलाई चेकजाँचका लागि रोकिएको थियो। सो क्रममा चालकले कारको डिकीमा केही नभएको बताउँदै अचानक फरार भएका थिए।
चालक फरार भएपछि प्रहरीले कारको डिकी खोलेर जाँच गर्दा साना–ठूला गरी गाँजाका ९ वटा पोका फेला पारेको थियो। बरामद गाँजा तौल गर्दा ११७ किलो ९१० ग्राम रहेको पुष्टि भएको प्रहरीले जनाएको छ।
घटनापछि फरार चालकको खोजी कार्य भइरहेको छ। प्रहरीले बरामद कार र गाँजा जिल्ला प्रहरी कार्यालय मकवानपुरमा राखेर आवश्यक कानुनी प्रक्रिया अगाडि बढाएको जनाएको छ।
चालक फरार रहेकाले गाँजा ओसारपसारमा संलग्न अन्य व्यक्ति तथा यसको स्रोतबारे थप अनुसन्धान भइरहेको छ।

