प्रधानमन्त्री ओलीले भने,- नेपालमा अब कसैले भिख माग्नुपर्दैन
काठमाडौं, फागनु २४ । प्रधानमन्त्री केपी शर्मा ओलीले अब नेपालमा खान नपाएर कोही मर्नु नपर्ने बताउनुभएको छ ।
काठमाडौंको भृकुटीमण्डपमा सातौं अन्तर्राष्ट्रिय व्यापार मेलाको उद्घाटन गर्दै प्रधानमन्त्री ओलीले केही दिनमै नेपाल भोकमरीमुक्त देशको घोषणा गरिने पनि जानकारी दिनुभयो ।
अब काम गर्न सक्नेले काम गरेर खाने र काम गर्न नसक्नेलाई सरकारले पाल्ने दावी गर्दै प्रधानमन्त्री ओेलीले सरकारले देशमै काम पाउने वातावरण बनाउन योजना बनाइरहेको बताउनुभयो । केही देशमा अझै पनि नेपाल भिख माग्ने देश भनेर चिनिने गरेको भन्दै ओलीले अब नेपालमा कसैले पनि भिख माग्नुनपर्ने पनि दावी गर्नुभयो ।
आउँदो ५ वर्षमा नेपालले विकासको क्षेत्रमा असाधारण उपलब्धि हासिल गर्ने भन्दै उहाँले उत्पादन र पर्यटन क्षेत्रको सुधार गरेर व्यापार घाटा मनग्य घटाउने दाबी गर्नुभयो । भ्रष्टाचार र भ्रष्टाचारीविरुद्ध सरकार कठोर हुने भन्दै प्रधानमन्त्री ओलीले घुस दिएर काम बन्छ भन्ने मानसिकता त्याग्न उद्योगी व्यापारीलाई आग्रह गर्नुभयो ।
कार्यक्रममा अर्थमन्त्री डाक्टर युवराज खतिवडाले नेपालले अहिले भोगिरहेको व्यापार घाटा घटाएर आर्थिक सम्बृद्धितर्फ जानु नै यो सरकारको मुख्य लक्ष्य भएको बताउनुभयो ।
यस्तै उद्योग वाणिज्य तथा आपूर्तिमन्त्री मातृका यादवले भ्रष्टाचारीलाई तत्काल कारवाही गर्ने चेतावनी दिनुभयो । २८ गतेसम्म चल्ने मेलामा नेपाल, भारत, चीन बंगलादेश र पाकिस्तानका विभिन्न उत्पादन राखिएको छ ।
