कांग्रेसको नजरमा सरकारका ६ महिना ! (भिडियो सहित)
काठमाण्डौं । प्रमुख प्रतिपक्षी नेपाली कांग्रेसले सरकार ६ महिनामा ‘जस्ट पास’ मात्र भएको बताएको छ । केपी शर्मा ओली प्रधानमन्त्री भएको ठीक ६ महिना पुगेको सन्दर्भमा आफ्ना धारणा तय गर्दै कांग्रेसले सरकारको यस्तो मूल्यांकन गरेको हो ।
आइतबार अपराह्न पार्टी कार्यालय सानेपामा पत्रकार सम्मेलन गरी कांग्रेस प्रवक्ता विश्वप्रकाश शर्माले सरकार प्रभावकारी हुन नसकेकाले जस्ट पासमात्र भएको आफुहरुको मूल्यांकन रहेको बताए । जस्ट पास भएर ‘समृद्ध नेपाली, सुखी नेपाली’ को नारा कार्यान्वयन नहुने भन्दै उनले कमजोरी सच्याउन सरकारलाई आग्रह गरे ।
६ महिनामा सरकार सात ठाउँमा चुकेको पनि कांग्रेसको निष्कर्ष छ । राष्ट्रियता, लोकतन्त्र, संघीयता, सुशासन, मूल्यवृद्धि, समृद्धि र न्यायालयमाथिको व्यवहारको विषयमा सरकार चुकेको प्रवक्ता शर्माले बताए ।
कांग्रेसको चाहना सरकारले समृद्धिको सपनालाई अघि बढाओस् भन्ने रहे पनि नीति तथा कार्यक्रम र बजेट सोहीअनुसार नआएको प्रवक्ता शर्माले बताए । ‘खोई कहाँ छ दुई तिहाइको सरकार ? कहाँ छ शक्तिशाली प्रधानमन्त्रीको ओझ ?’ उनले प्रश्न गरे ।
सरकारमाथि कांग्रेसको ७ आरोप:
१. राष्ट्रियताः उग्र राष्ट्रवादको कारुणिक विसर्जन । निर्वाचनको मैदानमा मत माग्दै गर्दा उग्र राष्ट्रवादको लहरले ठूलो प्रभाव पारेको थियो तर सरकार गठनको केही महिना नपुग्दै त्यसको सम्पूर्ण रंग बदलिन पुग्यो । खासगरी सरकारको नेतृत्व राष्ट्रवादको मुद्दामा नराम्रोसँग चुकेको तथ्य जगजाहेर छ ।
२. लोकतन्त्रः लोकतान्त्रिक प्रक्रियामा आउनु, निर्वाचित हुनु र लोकतान्त्रिक संस्कृति अनुरुपको हुनुमा फरक हुन्छ । प्रतिपक्षप्रति द्वेषयुक्त अभिव्यक्तिहरु, निषेधाज्ञा, मिडियामा बढ्दो हस्तक्षेप र नागरिक स्वतन्त्रतामाथि अतिक्रमण मार्फत् सरकारद्वारा प्रस्तुत प्रवृत्ति समग्रमा लोकतान्त्रिक संस्कृति अनुरुप किमार्थ होइन् ।
३. संघीयताः कमजोर गराउने, आलोचना बढाउने र असफल गराउने नियतमा देखियो संघीय सरकार ।
४. सुशासनः विश्वविद्यालयका उपकुलपति माथि अपमानजनक ब्यवहार, सुन प्रकरणमा भनिएका ठूला माछाको उन्मुक्ति, अनि भ्रष्टाचारको सत्ता संरक्षीत विकेन्द्रीकरणले कम्युनिष्ट सरकारको सुशासनको चित्र प्रष्ट्याएको छ ।
५. मूल्यवृद्धिः हिजो सर्वहाराको नारा आज सर्वहारालाई चर्को मूल्य उपहार । त्यसबारे प्रधानमन्त्रीबाट गैरजिम्मेवार जवाफ । स्थानीय तहमा कर आतंक हुदै गर्दा सिंहदरवारको उदासिन भूमिका ।
६. समृद्धि यात्राः सपनाको हवाई उडान तर नीति तथा कार्यक्रममा न इच्छाशक्ति देखियो न बजेट मार्फत त्यस्तो क्रमभंगको कुनै भिन्न कार्यक्रम आयो । ६ महिने उपलव्धिमा पुरानै प्रगतिका विवरण पनि समेटिएका छन् ।
७. न्यायालय प्रधानमन्त्रीको दोहोरो चरित्रको शिकार । कार्यपालिका र व्यवस्थापिकाको लाचार छायाँ बनाउने षडयन्त्र ।
