सभामुख चयन गर्न नसकेको भए हामीलाई देउ, हामी चलाइदिन्छौँ : देउवा
विराटनगर । सभामुखको बिषयलाई लिएर सत्तारुढ दलका शीर्ष नेताहरु ध्रुविकरणमा गइरहेका बेला प्रमुख प्रतिपक्षी दल नेपाली कांग्रेसका सभापति शेरबहादुर देउवाले कटाक्ष गरेका छन् । देउवाले नेकपाभित्र सभामुख हुने ब्यक्ति नभेटिए नेपाली कांग्रेसलाई दिन आग्रह गरेका छन् ।
‘सत्तारुढ दलले यति लामो समयसम्म एउटा पनि सभामुख भेटाउन सकेको छैन, हामीलाई दिए एक घण्टामा निर्णय लिन्छौ र संसद चलाइ दिन्छौ’ देउवाले भने ‘सभामुखको खोजि गर्दा संसदलाई बन्धक बनाउन पाइदैन ।’ सत्तारुढ दल नेकपाले सभामुखमा निर्णय लिन नसकेपछि देउवाले यस्तो कटाक्ष गरेका हुन् ।
‘सभामुखको खोजि गर्दा संसद बन्दक बनेको छ, संसद खुलेपछि हामी सदनमै प्रतिवाद गछौ’ बुधवार विराटनगरमा देउवाले भने ‘‘सभामुखलाई लिएर संसदलाई बन्धक बनाउन पाइँदैन । नेकपाले सभामुख चयन गर्न सक्दैन भने कांग्रेसलाई दिनुहोस्, हामी चलाइदिन्छौँ।’
देउवाले कांग्रेसभित्र अब कुनै विवाद नभएको जिकिर समेत गरे । ‘कांग्रेसभित्रको आन्तरिक विवाद हल भइसकेको छ । सवैसँग कुरा पनि मिलिसकेको छ’ देउवाले भने ‘सवै तहमा निर्धारित समयमै चुनाव हुन्छ । तपाईहरु सवै पार्टीको आन्तरिक चुनावमा लाग्नुहोस् ।’
