आदित्यसँगको रोमान्समा अनन्या, लिस्बनमा बिदा मनाएर फर्किए मुम्बई
काठमाडौं । प्रेमजोडी अनन्या पाण्डे र आदित्य रोय कपुरको रोमान्सले यतिबेला बलिउड गर्माएको छ । पोर्चुगलको लिस्बनमा दुई साता लामो बिदा मनाएर यो जोडी मुम्बई फर्किएको छ ।
बिदाका तस्वीर र भिडियो सामाजिक सञ्जालमा भाइरल भइरहेका छन् । दुवैले एकअर्कालाई डेट गरिरहेको चर्चा पनि छ । यो चर्चाबीच शनिबार साँझ दुवै मुम्बईमा पनि एकसाथ देखिए । यति मात्र होइन, दुवै जना कारमा सँगै बसेका थिए । क्यामेराको नजरमा परेपछि अनन्याले आफ्नो अनुहार लुकाउने प्रयास गरिन् ।
शनिबार साँझका यी तस्वीर मुम्बईको बान्द्रा क्षेत्रको हो । आदित्यले कार चलाइरहेका थिए भने अनन्या अघिल्लो सिटमा बसेकी थिइन् । दुवै जना गाडीमा बसेर हाँसिरहेका देखिन्थे । तर पापाराजीलाई देख्नेबित्तिकै अनन्या स्तब्ध भइन् र अनुहार लुकाउन थालिन् । यद्यपि यी सबैबीचमा आदित्य अचम्ममा परेनन्, न त उनले त्यस्तो कुनै काम गरे । बरु उनी हाँस्न थाले ।
यसअघि शनिबार अनन्याले इन्स्टाग्राममा लिस्बन छुट्टीका केही तस्वीरलाई सेयर गरेकी थिइन् । यी तस्वीरमा उनी बिकिनीमा देखिएकी छिन् । अनन्या र आदित्य अझै पनि आफ्नो छुट्टीको बारेमा मौन छन् । तस्वीर सेयर गर्दै अनन्याले क्याप्सनमा लेखेकी छिन्, ‘ब्लु बेबी ।’
अनन्याले सेयर गरेका तस्वीरमा समुन्द्रदेखि आकाशका तारासम्म सबै कुरा छ । त्यहाँ एउटा ऐना देखिने सेल्फी पनि छ, जसको पछाडि समुद्रको नीलो पानी अनन्तसम्म देखिन्छ । रमाइलो कुरा के छ भने अनन्याले यी तस्वीर सेयर गर्नेबित्तिकै सामाजिक सञ्जालमा फ्यानले आदित्यको बारेमा सोध्न थालेका छन् । एक फ्यानले लेखेका छन्, ‘फोटो क्रेडिट आदित्यलाई दिनुपर्थ्यो ।’ अर्काले लेखेका छन्, ‘नाइट म्यानेजर कहाँ छ ?’
अनन्या र आदित्य यो बिदाको यात्राबाट चर्चामा छन् । छुट्टी मनाउने क्रममा दुवैको तस्वीर लिक भएपछि हंगामा मच्चिएको थियो । लिस्बनबाट बाहिरिएका तस्वीरमा कतै आदित्य र अनन्या रोमान्टिक कुरा गर्दै छन् भने कतै दुवै स्कुटरको मज्जा लिइरहेका छन् ।
आदित्य र अनन्याको अफेयरको चर्चा पहिलो पटक गत वर्ष कृति सेननको दिवाली पार्टीमा सँगै देखिएपछि सुरु भएको थियो । तर दुवैले सम्बन्धलाई लिएर मौनता साँधेका छन् । लिस्बनबाट फर्किंदा पनि उनीहरु विमानस्थलबाट छुट्टाछुट्टै निस्किए ।
