सबैभन्दा धेरै उपाधि जित्ने खेलाडी बने मेसी
काठमाडौं । अर्जेन्टिनी कप्तान लियोनल मेसी विश्व फुटबलमा सबैभन्दा धेरै उपाधि जित्ने खेलाडी बनेका छन् ।
आइतबार अमेरिकी मेजर सकर लिग (एमएलएस)को इन्टर मियामीलाई क्लब इतिहासकै पहिलो उपाधि दिलाएसँगै मेसी विश्व फुटबलमा सबैभन्दा धेरै उपाधि जित्ने खेलाडी बनेका हुन् ।
इन्टर मियामीका कप्तान समेत रहेका मेसीले गत वर्ष कतारमा सम्पन्न फिफा विश्वकपमा अर्जेन्टिनालाई उपाधि सम्म डोहोर्याएका थिए ।
बार्सिलोना र पेरिस सेन्ट जर्मन (पीएसजी)का पूर्वखेलाडी मेसीले हालसम्म कुल ४४ उपाधि जितिसकेका छन् । मेसीले करिब दुई दशक बार्सिलोनामा बिताउँदा क्याटालन क्लबबाट ३५ उपाधि जितेका थिए ।
सन् २०२१ पछि दुई सिजन फ्रेन्च क्लब पीएसजीमा रहँदा मेसीले तीन उपाधि जिते । मेसीले अर्जेन्टिनाबाट पाँच उपाधि जितेका छन् ।
आइतबार भएको लिग्स कपको फाइनलमा एक गोल गरेका मेसी प्रतियोगितामा कुल १० सहित उच्च गोलकर्ता बने । प्रतियोगिताको सर्वोत्कृष्ट खेलाडी पनि मेसी नै चुनिए ।
गएको जुलाईमा मेसीलाई दुई वर्षका लागि भित्र्याएयता इन्टर मियामीले हालसम्म शतप्रतिशत नतिजा निकालेको छ ।
