श्री चन्चलादेवी वहुउद्देशीय दुग्ध सहकारी संस्था लि.धनकुटा १ हिलेको २९ औ वार्षिक साधारण सभा सम्पन्न
धनकुटा । श्री चन्चलादेवी वहुउद्देशीय दुग्ध सहकारी संस्था लि.धनकुटा १ हिलेको २९ औ वार्षिक साधारण सभा आज सम्पन्न भएको छ ।
सहकारी संस्थाका अध्यक्ष नगेन्द्र पाण्डेको अध्यक्षता तथा धनकुटा नगरपालिकाका प्रमुख चिन्तन तामाङको प्रमुख आतिथ्यमा सञ्चालित सभामा ४ करोड २६ लाख ६४ हजार ८ सय ९३ रुपया बराबरको आर्थिक वर्ष २०७९/८० को प्राप्ति भुक्तानी तथा नगद प्रवाह विवरण प्रस्तुत गरिएको छ ।
सभामा सहकारी संस्थाका व्यवस्थापक भिम मल्लले सहकारीको आर्थिक प्रतिवेदन प्रस्तुत गर्दै आर्थिक वर्ष २०७९/८० को ६८ लाख ५ हजार ५ सय ३९ रुपयाँ बराबरको आय व्यय विवरण प्रस्तुत गर्नुभयो ।
सभालाई सम्बोधन गर्दै कार्यक्रमका प्रमुख अतिथी धनकुटा नगरपालिकाका प्रमुख तामाङले किसानलाई वोनस दिएर प्रोत्साहित गर्न सुझाव दिनुभयो । उहाँले गत श्रावण महिना देखी किसानहरुले दुधको रकम नपाएको गुनासो आएको भन्दै पैसा नदिने डिडिसीको विकल्प खोज्न आग्रह समेत गर्नुभयो । किसानहरु दुध लिएर डिडिसीले कहाँ लाउछ ? त्यतिकै त फाल्दैन होला ! भन्दै दुधबाट भएको आम्दानी किसानहरुलाई दिनुपर्ने उहाँले बताउनु भयो ।
त्यस्तै जिल्ला सहकारी संघ धनकुटाका उपाध्यक्ष कमल लामिछानेले दुग्ध उत्पादक किसानहरुको समस्या समाधानका लागि जिल्ला सहकारी संघले पनि आवश्यक सहकार्य र समन्वय गर्ने उल्लेख गर्नुभयो । सभामा दुग्ध उत्पादक जिल्ला सहकारी संघका अध्यक्ष नारद वहादुर कटुवाल, सहकारी संस्थाका उपाध्यक्ष नर वहादुर थापा लगायतले शूभकामना मन्तव्य राखेका थिए ।
साधारण सभाको अवरसमा सहकारी संस्थाले वर्ष भरी उत्कृष्ट दुध ल्याने तीन जना र बढी दुध ल्याउने तीन जना किसानलाई नगद र प्रमाण पत्र सहित सम्मान गरेको छ । सम्मानित हुनेहरुमा उत्कृष्ट दुध ल्याउने तर्फ प्रदीप तामाङ,अमृता तामाङ र राम बहादुर तामाङ रहेका छन् । त्यस्तै धेरै दुध ल्याउने तर्फ गजेन्द्र कार्की, ईन्द्र वहादुर बुढाथोकी र धनिमाया तामाङ रहेका छन् । उनिहरु मध्ये कार्कीले वर्षभरीमा ९ हजार ४ सय ८७ दशमलव ३ लिटर, बुढाथोकीले ८ हजार ५ सय ८६ दशमलव ९ लिटर र तामाङले ८ हजार १ सय ६३ दशमलव ८ लिटर दुध संकलन गरेको सभामा जानकारी गराईएको छ । सभामा सहकारीका जेष्ठ सदस्य ढकल हादुर कार्की लाई दोसल्ला ओढाएर सम्मान गरिएको थियो ।
स्वागत मन्तव्य संस्थाका सह-सचिव खगेन्द्रलाल राईले राख्नुभएको थियो । चन्चला देवी वहुउद्श्यीय दूग्ध उत्पादक सहकारी संस्थाले वर्षिक ६ लाख ४८ हजार लिटर दूध संकलन गर्दै आईरहेको छ ।
