धनकुटाको साँगुरीगढी गाउँपालिकामा बजेट ‘होलिडे’
धनकुटा,२ साउन । धनकुटाको साँगुरीगढी गाउँपालिकाले जनप्रतिनिधीको जेसीभी खरिद गर्ने कि न गर्ने भन्ने विवादका कारण बजेट ल्याउन नसक्दा पालिकामा बजेट होलिडे भएको छ ।
स्थानीय तहले असार १० भित्र गाउँ सभामा बजेट पेश गर्नु पर्ने र असार मसान्तसम्म पारित गरिसक्नुपर्छ संवैधानिक व्यवस्था भए पनि साँगुरीगढी गाउँपालिका भने जनप्रतिनिधीको विवादका कारण समयमा बजेट ल्याउन र बजेट पारित गर्न असफल भएको हो ।
बजेट लगायत विभिन्न विषयमा पटक–पटक वसेको कार्यपालिका वैठकमा सहमति हुन नसक्दा आर्थिक वर्ष २०८१÷८२ को बजेट ल्याउन नसक्दा पालिकामा बजेट होलिडे भएको छ ।
सहमतिको लागि पटक पटक छलफल गरे पनि सहमति नभएको र बजेट होलिडे सम्मको अवस्था सिर्जना भएको गाउँपालिका अध्यक्ष जितेन्द्र राईले बताए । बजेट होलिडे हुँदा दैनिक प्रशासनिक काम ठप्प भएको छ । राजश्व संकलन समेत रोकिएको छ । समयमै बजेट ल्याउन नसक्दा साँगुरीगढी गाउँपालिका दैनिक खर्च गर्न नपाउने अवस्थामा पुगेको छ ।
