मोरङमा मोटरसाइकल दुर्घटना : २ जनाको मृत्यु, १ जना घाइते
विराटनगर । मोरङको बूढीगंगा गाउँपालिकामा शुक्रबार राति दुर्घटना हुँदा २ जनाको मृत्यु भएको छ । १ जना गम्भीर घाइते भएका छन् ।
अलगअलग स्थानमा मोटरसाइकल दुर्घटना भएको हो । एउटा दुर्घटना बूढीगंगा–२ अमाही बोक्ला टोलस्थित भित्री सडकखण्डमा राति १०ः१५ बजेतिर भएको प्रहरीले जनाएको छ ।
मोरङ ट्राफिक प्रमुख इन्स्पेक्टर राजन लम्सालका अनुसार नेमुवाबाट अमाहीतर्फ जाँदै गरेको को ३५ प ५०३३ नम्बरको मोटरसाइकल आफैं अनियन्त्रित भएर दुर्घटनामा पर्दा चालक बूढीगंगा–२ का ३५ वर्षीय विकासकुमार भगतको मृत्यु भएको छ । गम्भीर घाइते भएका उनलाई उपचारका लागि विराट शिक्षण अस्पताल लगिएको थियो ।
भगतको उपचारका क्रममा राति १२ः३२ बजेतिर मृत्यु भएको इन्स्पेक्टर लाम्सालले बताए । मोटरसाइकल इलाका प्रहरी कार्यालय नेमुवाको नियन्त्रणमा छ ।
त्यस्तै, कोशी लोकमार्गअन्तर्गत बूढीगंगा–३ स्थित एसियन फ्यूल सेन्टरनजिक राति ११ बजेतिर अर्को दुर्घटना भएको छ । नेमुवाबाट विराटनगरतर्फ आउँदै गरेको को २१ प ८६९२ नम्बरको मोटरसाइकल सडकको डीभाईडरमा ठोक्किएर दुर्घटनामा परेको जानकारी इन्स्पेक्टर लम्सालले दिए ।उनका अनुसार दुर्घटनामा परेर मोटरसाइकलको पछाडि सवार विराटनगर महानगरपालिका–४ का ४२ वर्षीय कात्तिक विश्वासको मृत्यु भएको हो । गम्भीर घाइते अवस्थाका उनलाई घटनास्थलबाट उद्धार गरेर उपचारका लागि कोशी अस्पताल लगिएको थियो ।
अस्पताल पुर्याउनसाथ चिकित्सकले मृत घोषित गरेको प्रहरीले जनाएको छ । दुर्घटनामा परेर मोटरसाइकल चालक विराटनगर–४ का सञ्जय थान्दार गम्भीर घाइते भएका छन् । उनको विराट शिक्षण अस्पतालमा उपचार भइरहेको जानकारी प्रहरीले दिएको छ ।दुर्घटनाग्रस्त मोटरसाइकल इलाका प्रहरी कार्यालय नेमुवाको नियन्त्रणमा छ ।
दुवै घटनाको अनुसन्धान भइरहेको प्रहरीले जनाएको छ ।
