मोरङमा ग्यास सिलिन्डर पड्किएर भीषण आगलागी,३ वटा पसलमा क्षति
मोरंग । मोरङको रतुवामाई नगरपालिका–६ सौँठा चोकमा सोमबार बिहान आगलागी हुँदा ३ वटा पसलमा क्षति पुगेको छ ।
ग्यास सिलिन्डर पड्किएर भीषण आगलागी हुँदा पसलहरु पूर्णरुपमा ध्वस्त भएका छन् । प्रहरीका अनुसार बिहान करिब ६ बजे खाना पकाउने क्रममा ग्यास सिलिन्डर पड्किँदा आगो सल्किएको प्रारम्भिक अनुसन्धानबाट खुलेको छ ।
आगोले टीका खनालले सञ्चालन गर्दै आएको चिया पसल, सूर्यमान श्रेष्ठको चस्मा पसल र किराना पसल जलेर सम्पूर्ण रुपमा क्षति पुगेको मोरङ प्रहरी प्रवक्ता डीएसपी कोपिला चुँडालले बताइन् । उनीहरुले टेकमान लिम्बूको जग्गा भाडामा लिएर सञ्चालन गर्दै आएका थिए ।
आगलागीबाट ८ लाख बराबरको क्षति प्रहरीको प्रारम्भिक अनुमान छ । स्थानीयबासी, नेपाल र सशस्त्र प्रहरी तथा दमकलको सहयोगमा करिब १ घण्टापछि आगो नियन्त्रणमा लिइएको थियो ।-बेतना दैनिक
