इलाममा आएको भीषण पहिरोमा परी मृत्यु हुनेको संख्या २१ पुग्यो
इलाम । अविरल वर्षापछि इलाममा आएको भीषण पहिरोमा परी मृत्यु हुनेको संख्या २१ पुगेको छ। शनिबार राति गएको पहिरोले एकै परिवारका ६ जनासहित ठूला जनधनको क्षति पुर्याएको जिल्ला प्रहरी कार्यालय इलामले जनाएको छ।
कोशी प्रदेश प्रहरीका प्रवक्ता एसएसपी दीपक पोखरेलका अनुसार, पहिरोपीडितहरूका उद्धार कार्य निरन्तर जारी छ। नेपाली सेना, सशस्त्र प्रहरी, नेपाल प्रहरी र स्थानीय स्वयंसेवकहरू उद्धारमा खटिएका छन्। उनले भने, “सडक अवरुद्ध भएकाले उद्धार टोली घटनास्थल पुग्न र राहत सामग्री पठाउन कठिनाइ भइरहेको छ, तर हेलिकप्टरमार्फत उद्धार जारी छ।”
घटनास्थल माईजोगमाई नगरपालिका, सूर्योदय नगरपालिका र माङसेवुङ गाउँपालिका क्षेत्रमा पर्ने विकट भूभागमा रहेको छ, जहाँ लगातारको वर्षाका कारण सडक र संचार सेवा दुवै प्रभावित छन्। प्रहरीका अनुसार धेरै व्यक्ति अझै सम्पर्कविहीन छन्।
नेपाली सेनाको हेलिकप्टरमार्फत घाइतेहरूलाई सुरक्षित स्थानमा सार्ने र राहत सामग्री पुर्याउने काम भइरहेको छ। स्थानीय प्रशासनले जनतालाई उच्च सतर्कता अपनाउन अनुरोध गरेको छ।
पहिरोका कारण मेची राजमार्गका धेरै खण्ड अवरुद्ध भएका छन्, जसले पूर्वी पहाडी यातायात सम्पर्क पूर्ण रूपमा रोकिएको छ।
स्थानीयवासीहरूका अनुसार वर्षासँगै आएको पहिरोले घर, खेतबारी र सडकसमेत बगाएको छ। अधिकारीहरूले यो घटना पछिल्ला वर्षहरूकै सबैभन्दा ठूलो विपद् हुनसक्ने बताएका छन्।
