झापाको दमकमा सुतेकै कोठाभित्र एक बालक मृत फेला
झापा । झापाको दमकमा सुतेकै कोठाभित्र एक बालक मृत अवस्थामा फेला परेका छन्।
दमक नगरपालिका–५, धनेश्वर चोक निवासी चन्द्रमान रिमालका ५ वर्षीय छोरा लविस रिमाल मृत फेला परेका हुन्।
परिवारका अनुसार, बालक लविस रिमाल बेलुका आफ्नै घरको तल्लो तलामा बुवासँगै सुतेका थिए। तर, बिहान उठ्दा उनी मृत अवस्थामा फेला परेको परिवारले जनाएको छ। बालकको अचानक मृत्युले परिवार शोकमा परेको छ।
घटनाको जानकारी पाएलगत्तै इलाका प्रहरी कार्यालय, दमकबाट प्रहरी टोली घटनास्थल पुगेको थियो। प्रहरीले घटनाबारे आवश्यक अनुसन्धान र अन्य कानुनी प्रक्रिया अघि बढाइसकेको जानकारी दिएको छ।
बालकको मृत्युको कारण खुल्न सकेको छैन र प्रहरीले अनुसन्धानपछि थप विवरण आउने बताएको छ।
