प्रधानमन्त्री कार्कीद्वारा पाथीभरा मन्दिरको दर्शन
ताप्लेजुङ, फागुन १ गते । पूर्वी हिमाली जिल्लाहरूको स्थलगत अवलोकनमा रहनु भएका प्रधानमन्त्री सुशीला कार्कीले पाथीभरा मन्दिरको दर्शन गर्नु भएको छ ।
निर्वाचन तयारी र सुरक्षा व्यवस्थाबारे सरोकारवालासँग प्रत्यक्ष छलफल गर्ने मुख्य उद्देश्यसहित जिल्ला भ्रमणमा रहनु भएका प्रधानमन्त्री कार्कीले पाथिभरा मन्दिरमा पूजा आराधना गर्नु भएको छ ।
प्रमुख जिल्ला अधिकारी शिवराज सेढाईंका अनुसार प्रधानमन्त्री कार्की बिहान ८ बजे पाथीभरा दर्शनका लागि आइपुग्नु भएको थियो । मन्दिर दर्शन पछि अहिले जिल्लास्थित मुख्य निर्वाचन अधिकृतको कार्यालयमा छलफलको कार्यक्रममा प्रधानमन्त्री कार्की सहभागी हुनु भएको छ ।
प्रधानमन्त्री कार्कीले पूर्वनिर्धारित कार्यतालिका अनुसार बिहीबार सोलुखुम्बु जिल्लाको भ्रमण सम्पन्न गरेर शुक्रबार ताप्लेजुङ आइपुग्नु भएको हो । पूर्वी हिमाली जिल्लामा केन्द्रित यो भ्रमणलाई आगामी निर्वाचनको तयारी र समन्वयलाई सुदृढ बनाउने उद्देश्यले हेरिएको छ ।-रेडियो काबेली
