झापाका २८६ मतदान केन्द्र ‘अतिसंवेदनशील’, झापा–५ मा उच्च सुरक्षा सतर्कता
झापा । आसन्न प्रतिनिधिसभा निर्वाचनलाई लक्षित गर्दै झापाका ९५ मतदानस्थल र २८६ मतदान केन्द्रलाई ‘अतिसंवेदनशील’ सूचीमा राखिएको छ। तीमध्ये झापा–५ का मात्रै २० मतदानस्थलका ७० मतदान केन्द्र उच्च जोखिममा राखिएका छन्।
स्थानीय प्रशासनका अनुसार झापा–१ का १६ मतदानस्थल (५४ केन्द्र), झापा–२ का १६ मतदानस्थल (५५ केन्द्र), झापा–३ का १९ मतदानस्थल (४० केन्द्र) र झापा–४ का २५ मतदानस्थल (६७ केन्द्र) पनि अतिसंवेदनशील मानिएका छन्।
एमाले अध्यक्ष केपी शर्मा ओली र रास्वपाका वरिष्ठ नेता बालेन्द्र शाह (बालेन)बीच प्रतिस्पर्धा हुने आकलन गरिएकाले झापा–५ लाई निर्वाचनको ‘इपिसेन्टर’ मानेर सुरक्षा कडाइ गरिएको प्रशासनको संकेत छ।प्रमुख जिल्ला अधिकारी शिवराम गेलालले केही केन्द्रलाई अघिल्लो निर्वाचनभन्दा फरक वर्गीकरण गरिएको स्वीकारेका छन्।
जिल्लामा कुल २८५ मतदानस्थल र ८१५ मतदान केन्द्रमध्ये १४७ केन्द्र ‘संवेदनशील’ र ४३ मतदानस्थल ‘सामान्य’ श्रेणीमा राखिएको प्रशासनले जनाएको छ।
