निर्वाचनका लागि नेपाल–भारत सीमा ७२ घण्टा बन्द गर्ने सहमति
विराटनगर । आगामी फागुन २१ गते हुने प्रतिनिधिसभा निर्वाचनलाई लक्षित गर्दै नेपाल–भारत संयुक्त सुरक्षा बैठक बिहीबार विराटनगरमा सम्पन्न भएको छ।
बैठकले मतदानको ७२ घण्टा अगाडिदेखि नेपाल–भारत सीमा नाका पूर्ण रूपमा बन्द गर्ने सहमति गरेको छ।
भारतसँग खुला सीमा जोडिएका कोशी प्रदेशका झापा, मोरङ र सुनसरी जिल्लाका सुरक्षा प्रमुखहरू तथा ती जिल्लासँग सीमाना जोडिएका भारतका किशनगञ्ज, अररिया र सुपौल जिल्लाका सुरक्षा अधिकारीहरूबीच भएको बैठकले निर्वाचन अवधिमा सम्भावित अवाञ्छित गतिविधि रोक्न कठोर सुरक्षा रणनीति अपनाउने निर्णय गरेको हो ।
बैठकको सहमतिअनुसार फागुन १८ गते रातिदेखि फागुन २१ गते रातिसम्म सीमा नाका बन्द गरिनेछ। उक्त अवधिमा अत्यावश्यक सेवाबाहेक सबै प्रकारका आवागमनमा पूर्ण रोक लगाइनेछ।
मतदान अवधिमा निजी सवारी, सार्वजनिक यातायात, व्यवसायिक आवतजावत तथा अन्य नियमित गतिविधि बन्द रहनेछन्। स्वास्थ्य सेवा, आपतकालीन उद्धार, सरकारी समन्वय तथा विशेष परिस्थितिबाहेक सीमा पार आवागमनलाई अनुमति नदिने सहमति भएको सुरक्षा अधिकारीहरूले जनाएका छन्।
