निर्वाचनका लागि धनकुटामा ९९९ जना कर्मचारी परिचालन
धनकुटा । फागुन २१ गते हुन गइरहेको प्रतिनिधिसभा सदस्य निर्वाचनका लागि धनकुटामा ९९९ जना कर्मचारी परिचालन गरिएको छ ।
मुख्य निर्वाचन अधिकृतको कार्यालय धनकुटाले सूचना जारी गर्दै फागुन २१ गते हुने गइरहेको प्रतिनिधि सभा सदस्य निर्वाचनका लागि धनकुटाका १६६ मतदान केन्द्र र दुईवटा अस्थायी मतदान केन्द्रका लागि ९९९ जना कर्मचारी परिचालन गरिएको जनाएको छ ।
परिचालन गरिएको कर्मचारीमध्ये हरेक मतदान केन्द्रमा ६ जनाका दरले र अस्थायी मतदान केन्द्रमा तीनजनाका दरले कर्मचारी खटाइनेछ ।
निर्वाचन आयोगको निर्णयअनुसार तीन सयजनाभन्दा कम मतदाता रहेको मतदान केन्द्रमा पाँचजना मात्र कर्मचारी परिचालन गर्ने भए पनि चौबिसे गाउँपालिकाको तीनवटा मतदान केन्द्रमा तीन सयभन्दा कम मतदाता भएकाले ती तीनवटा मतदान केन्द्रमा पाँचजनाका दरले मात्र कर्मचारी खटाइने जिल्ला निर्वाचन कार्यालय धनकुटाले जनाएको छ ।
एक मात्र निर्वाचन क्षेत्र रहेको धनकुटा जिल्लामा पुरुष ५९ हजार ४८३ जना र महिला ५८ हजार ९४२ जना गरी कुल एक लाख १८ हजार ४२५ जना मतदाता रहेका छन् भने ११९ मतदानस्थल र १६६ मतदान केन्द्र तोकिएका छन् ।
