धनकुटाबाट निर्वाचित सांसद राईको चुनावी खर्च २६ लाख ९५ हजार
धनकुटा । धनकुटाबाट प्रतिनिधि सभा सदस्यमा निर्वाचित नेकपा एमालेका केन्द्रीय सदस्य राजेन्द्र कुमार राईले आफ्नो चुनावी खर्च विवरण बुझाएका छन् । उनले आज जिल्ला निर्वाचन कार्यालय धनकुटामा चुनावी खर्च विवरण बुझाएका हुन् ।
उनले चुनावमा २६ लाख ९५ हजार खर्च भएको विवरण निर्वाचन कार्यालयमा बुझाएका छन् । उम्मेदवारी मनोनयन शुल्क १० हजार, मतदाता नामावली खरिद ३ हजार, सवारी-साधन भाडा तथा इन्धनमा ८ लाख ३५ हजार खर्च भएको विवरणमा उल्लेख छ ।
यस्तै छपाइ, विद्युतीय माध्यम तथा प्रचार-प्रसारमा ३ लाख ५४ हजार, वडा भेला तथा कार्यकर्ता परिचालनमा ६ लाख ५० हजार, मतदान केन्द्रमा प्रतिनिधि परिचालनमा ४ लाख ८० हजार, कार्यालय सञ्चालनमा ३ लाख १३ हजार र विविधमा ५० हजार खर्च भएको उल्लेख छ ।
