मोरङको कानेपोखरीमा टिपरको ठक्करबाट साइकल यात्रीको मृत्यु
मोरङ । मोरङको कानेपोखरीमा टिपरको ठक्करबाट बिहीबार बिहान साइकल यात्रीको मृत्यु भएको छ ।
जहदाबाट कानेपोखरीतर्फ जाँदै गरेको को १ ख ६३३१ नम्बरको टिपरले विपरीत दिशाबाट आउँदै गरेको साइकललाई बिहान ७ः४० बजेतिर ठक्कर दिएको प्रहरीले जनाएको छ । मोरङ ट्राफिक प्रहरी प्रमुख इन्स्पेक्टर सन्तोष न्यौपानेका अनुसार टिपरको ठक्करबाट साइकलमा यात्रा गरिरहेका कानेपोखरी गाउँपालिका–७ का ५८ वर्षीय वीरेन्द्र कार्कीको मृत्यु भएको हो ।
दुर्घटनामा परेर गम्भीर घाइते भएका कार्कीलाई उपचारका लागि उर्लाबारीको मंगलबारेस्थित मदन भण्डारी अस्पताल एवं ट्रमा सेन्टर पुर्याइएको थियो । अस्पताल पुर्याउनसाथ बिहान ८ः४० बजेतिर चिकित्सकले मृत घोषित गरिदिएका हुन् ।
साइकल, टिपर र टिपर चालक कानेपोखरी–५ का २९ वर्षीय अभिषेक दर्जीलाई नियन्त्रणमा लिएर प्रहरीले घटनाको अनुसन्धान सुरु गरेको छ । टिपरको तीव्र गतिका कारण दुर्घटना भएको प्रहरीले जनाएको छ ।
