इटहरीमा मध्यराती आगलागी हुँदा एक घर जलेर पूर्ण रूपमा नष्ट
सुनसरी । सुनसरीको इटहरी उपमहानगरपालिका–२ भृकुटी चोकमा आगलागी हुँदा एक घर पूर्ण रूपमा जलेर नष्ट भएको छ।
स्थानीय माया राईको घरमा आज (बुधबार) विहान २ बजे आगलागी हुँदा घर पूर्ण रूपमा जलेर नष्ट भएको हो।
इटहरी उपमहानगरपालिकाका दमकलहरू गत भदौ २४ गते ‘जेनजी’ आन्दोलनका क्रममा जलेर नष्ट भएकाले समयमै आगो नियन्त्रण गर्न कठिनाइ भएको स्थानीयले गुनासो गरेका छन्।
छिमेकी नगरपालिकाबाट दमकल आउन ढिलाइ हुँदा आगलागी नियन्त्रणमा समस्या भएको बताइएको छ।
जिल्ला प्रहरी कार्यालय सुनसरीका सूचना अधिकारी चन्द्र खड्काका अनुसार आगलागीबाट भएको क्षतिको पूर्ण विवरण संकलन हुन बाँकी रहेको छ।
धरान र दुहबीबाट गएको दमकल, प्रहरी र स्थानीयको सहयोगमा करिब तीन घण्टापछि आगो नियन्त्रणमा लिइएको थियो।
प्रहरीका अनुसार विद्युत् सर्ट भई आगलागी भएको प्रारम्भिक अनुमान गरिएको छ भने घटनाबारे थप अनुसन्धान भइरहेको जनाइएको छ।
