देशका विभिन्न राजमार्गमा अवरोध, तीन सडक पूर्ण रूपमा बन्द
काठमाडौं । देशका विभिन्न जिल्लामा आएको बाढी तथा पहिरोका कारण प्रमुख राजमार्गहरू प्रभावित भएका छन्। नेपाल प्रहरीद्वारा सार्वजनिक गरिएको आज बिहान ८ बजेसम्मको विवरणअनुसार तीन स्थानका सडक पूर्ण रूपमा अवरुद्ध भएका छन् भने दुई स्थानमा एकतर्फी यातायात सञ्चालन भइरहेको छ।
काठमाडौंको चन्द्रागिरि नगरपालिका–१ देउराली देवीस्थानस्थित सतुंगल–चित्लाङ सडक खण्ड पहिरोका कारण पूर्ण रूपमा अवरुद्ध भएको छ। मर्मत कार्य सम्पन्न हुन करिब एक महिना लाग्ने भएकाले उक्त सडक बन्द रहने जनाइएको छ।
यस्तै, पाँचथरको याङवरक गाउँपालिका–२ दोभानस्थित मध्यपहाडी लोकमार्ग बाढीका कारण पूर्ण रूपमा अवरुद्ध भएको छ भने रोल्पाको परिवर्तन गाउँपालिका–१ बागास्थित घोराही–थवाङ शहीद राजमार्ग पनि पहिरोका कारण पूर्ण रूपमा बन्द रहेको छ।
भोजपुर नगरपालिका–५ बारीघुमस्थित मध्यपहाडी लोकमार्गमा बाढीका कारण एकतर्फी यातायात सञ्चालन भइरहेको छ। त्यस्तै, संखुवासभाको मकालु गाउँपालिका–३ नयाँ बस्तीस्थित कोशी राजमार्ग पनि पहिरोका कारण एकतर्फी रूपमा सञ्चालनमा रहेको छ।
उता, सम्भावित बाढीको जोखिमलाई मध्यनजर गर्दै खुर्कोट–नेपालथोक–कटुन्जेबेंसी हुँदै चल्ने बीपी राजमार्ग खण्डमा सवारी साधन सञ्चालनमा रोक लगाइएको छ।
प्रहरीले प्रभावित क्षेत्रमा यात्रा गर्दा आवश्यक सतर्कता अपनाउन तथा वैकल्पिक मार्ग प्रयोग गर्न सर्वसाधारणलाई आग्रह गरेको छ।
