मोरङको केराबारीमा बसको ठक्करबाट वृद्धको मृत्यु
मोरङ । मोरङको केराबारी गाउँपालिकामा यात्रुवाहक बसको ठक्करबाट एक जना वृद्धको मृत्यु भएको छ।
सोमबार अपराह्न करिब ४ बजे धरानबाट यात्रु लिएर केराबारीतर्फ आउँदै गरेको को १ ख २८२४ नम्बरको बसले मदन भण्डारी लोकमार्गअन्तर्गत केराबारी गाउँपालिका–७ स्थित दाहाल चोकमा पैदलयात्रीलाई ठक्कर दिएको हो।
प्रहरीका अनुसार दुर्घटनामा केराबारी–७ निवासी ८० वर्षीय लोकबहादुर राई गम्भीर घाइते भएका थिए। उपचारका लागि धरानस्थित बिपी कोइराला स्वास्थ्य विज्ञान प्रतिष्ठान लगिए पनि चिकित्सकले उनलाई मृत घोषणा गरेका थिए।
मोरङ ट्राफिक प्रहरी प्रमुख इन्स्पेक्टर सन्तोष न्यौपानेका अनुसार पैदल हिँडिरहेका बेला बसले ठक्कर दिएको थियो। दुर्घटनापछि प्रहरीले बस र चालक केराबारी–५ निवासी २५ वर्षीय संगम रानामगरलाई नियन्त्रणमा लिएको छ।
घटनाबारे थप अनुसन्धान भइरहेको प्रहरीले जनाएको छ।
