झापाको गौरादहमा टिफरको ठक्करबाट साइकल यात्रीको मृत्यु
झापा । झापाको गौरादह नगरपालिका–१ स्थित नवदुर्गा पेट्रोल पम्प नजिक पाडाजुँगी–गौरीगञ्ज भित्री सडक खण्डमा टिफरको ठक्करबाट एक वृद्ध साइकल यात्रीको मृत्यु भएको छ।
असार २ गते राति करिब ८ बजेर २० मिनेटको समयमा डिपुचोकबाट पेट्रोल पम्पतर्फ जाँदै गरेको प्र.१–०१–००१ क ११८८ नम्बरको टिफरले साइकललाई ठक्कर दिएको थियो।
ठक्करबाट गौरादह नगरपालिका–४ बस्ने ६१ वर्षीय प्रेम प्रसाद गुरागाई गम्भीर घाइते भएका थिए। टाउको र शरीरका विभिन्न भागमा चोट लागेका उनलाई उपचारका लागि तत्काल दमक अस्पताल लगिएको थियो।
तर उपचार सुरु गरेको केही मिनेटमै राति ८ बजेर ४५ मिनेटमा चिकित्सकले उनलाई मृत घोषणा गरेका थिए।
दुर्घटनापछि टिफर र चालक गौरादह नगरपालिका–१ बस्ने ३५ वर्षीय उमेश ताजपुरिया प्रहरी नियन्त्रणमा रहेका छन्। घटनाबारे थप अनुसन्धान भइरहेको प्रहरीले जनाएको छ।
