धनकुटाबाट ५ ग्राम ब्राउन सुगर सहित एक युवक पक्राउ
धनकुटा, असार ६ । धनकुटा प्रहरीले लागुऔषधसहित एक युवकलाई नियन्त्रणमा लिएको छ।
जिल्ला प्रहरी कार्यालय धनकुटाबाट प्रहरी नायव निरीक्षक उमेश खडकाको कमाण्डमा खटिएको टोलीले शनिबार साँझ विशेष सुराकीका आधारमा धनकुटा नगरपालिका–१० पात्ले क्षेत्रमा चेकजाँच गर्ने क्रममा सुनसरीको देवानगञ्ज नगरपालिका–५ साहेबगञ्ज निवासी २६ वर्षीय पप्पु भनिने सनि कुमार मण्डललाई पक्राउ गरेको जिल्ला प्रहरी कार्यालय धनकुटाका सुचना अधिकारी प्रहरी नायव उपरीक्षक हेमन्त भण्डारी क्षेत्रीले जानकारी दिए ।
प्रहरीका अनुसार शंकास्पद अवस्थामा रहेका मण्डलको शरीर तथा साथमा रहेको सामान चेकजाँच गर्दा ब्राउन सुगर जस्तो देखिने ५ ग्राम लिसाइलो पदार्थ फेला परेको थियो।
लागुऔषध बरामद भएपछि उनलाई नियन्त्रणमा लिई जिल्ला प्रहरी कार्यालय धनकुटामा राखिएको छ।
घटनाबारे थप अनुसन्धान भइरहेको प्रहरीले जनाएको छ।
