विराटनगरबाट स्रोत नखुलेको २ लाख ३३ हजार रुपैयाँ सहित एक जना पक्राउ
विराटनगर । मोरङको विराटनगर महानगरपालिका–१५ स्थित एक नम्बर ढाटबाट स्रोत नखुलेको नेपाली नगदसहित एक जनालाई सशस्त्र प्रहरीले नियन्त्रणमा लिएको छ।
सशस्त्र प्रहरी बल नेपाल, सीमा सुरक्षा गुल्म रानीबाट खटिएको टोलीले आइतबार दिउँसो करिब ३ बजे भारतबाट नेपालतर्फ पैदल आउँदै गरेका मोरङको जहदा गाउँपालिका–१ निवासी ५७ वर्षीय मोहम्मद नफिजलाई शंकास्पद अवस्थामा जाँच गरेको थियो।
जाँचका क्रममा नफिजको साथबाट स्रोत खुलाउन नसकेको नेपाली नगद २ लाख ३३ हजार ८५० रुपैयाँ बरामद भएको सशस्त्र प्रहरीले जनाएको छ।
बरामद रकममध्ये एक हजार दरका १९७ थान, पाँच सय दरका ७३ थान, एक सय दरका तीन थान तथा ५० रुपैयाँ दरको एक थान नोट रहेको प्रहरीले जनाएको छ।
सशस्त्र प्रहरीको गस्ती टोलीले नगदसहित नफिजलाई नियन्त्रणमा लिएर आवश्यक अनुसन्धान तथा कानुनी कारबाहीका लागि इलाका प्रहरी कार्यालय रानीमा बुझाएको छ।
प्रहरीका अनुसार बरामद रकम अवैध हुण्डी कारोबारसँग सम्बन्धित हुन सक्ने प्रारम्भिक अनुमान गरिएको छ। घटनाबारे थप अनुसन्धान भइरहेको प्रहरीले जनाएको छ।
