इलामको राजदुवाली स्थित मेची राजमार्गमा ट्रक दुर्घटना
इलाम, असार १५ । इलाम नगरपालिका–९ राजदुवालीस्थित मेची राजमार्गमा गोलिया लोड गरेको ट्रक दुर्घटनामा परेको छ।
आज अपराह्न करिब ३:५० बजे इलामबाट झापातर्फ जाँदै गरेको प्र १–०१–००१ ख ३८७३ नम्बरको ट्रक आफैं अनियन्त्रित भई सडकबाट करिब १०० मिटर तल खसेर दुर्घटनामा परेको हो।
घटनाको जानकारी प्राप्त हुनासाथ प्रहरी चौकी गोलाखर्कबाट प्रहरी सहायक निरीक्षक (प्रसनि) उत्तमबहादुर भुजेलको कमाण्डमा ट्राफिक प्रहरीसहितको टोली घटनास्थलमा पुगेको थियो।
प्रहरीका अनुसार दुर्घटनामा कुनै मानवीय क्षति भएको छैन। ट्रक चालक झापा, मेचीनगर नगरपालिका–१३ निवासी ३६ वर्षीय प्रकाश तिम्सिना सकुशल रहेका छन्।
दुर्घटनाको कारण तथा ट्रकमा भएको क्षतिको विवरणबारे थप अनुसन्धान भइरहेको प्रहरीले जनाएको छ।
