भारतीय कारको ठक्करबाट मोटरसाइकल पछाडि सवारको मृत्यु, चालक पक्राउ
धनगढी । कैलालीको धनगढी उपमहानगरपालिका–३ बोराडाँडी चोकमा भारतीय नम्बर प्लेटको कारले मोटरसाइकललाई ठक्कर दिँदा एक जनाको मृत्यु भएको छ।
धनगढी चौराहाबाट अत्तरियातर्फ जाँदै गरेको से ४ प ९५२ नम्बरको मोटरसाइकललाई UP65EX0100 नम्बरको भारतीय कारले ठक्कर दिएको थियो। दुर्घटनामा मोटरसाइकलको पछाडि सवार बैतडीको सिगास गाउँपालिका–१ गजकोटका ४८ वर्षीय पदम चन्द गम्भीर घाइते भएका थिए। उनलाई उपचारका लागि मायामेट्रो अस्पताल, धनगढी लगिएकोमा उपचारकै क्रममा मृत्यु भएको प्रहरीले जनाएको छ।
दुर्घटनापछि फरार भएका कार चालक भारतको उत्तर प्रदेश, वाराणसी निवासी ४२ वर्षीय अश्वनी कुमार सिंहलाई कारसहित कैलालीको गोदावरी नगरपालिका–६ लालपुरबाट प्रहरीले पक्राउ गरेको छ।
मोटरसाइकल चालक गौतम ऐरको सीपी अस्पताल, धनगढीमा उपचार भइरहेको छ। उनको अवस्था सामान्य रहेको प्रहरीले जनाएको छ। घटनाबारे थप अनुसन्धान भइरहेको छ।
