जेन्जी आन्दोलनका क्रममा झुम्का कारागारबाट फरार कर्तव्य ज्यान मुद्दाका कैदी तेह्रथुमबाट पक्राउ
तेह्रथुम । जेन्जी आन्दोलनका क्रममा सुनसरीको झुम्का कारागारबाट फरार भएका कर्तव्य ज्यान मुद्दाका एक कैदीलाई प्रहरीले तेह्रथुमबाट पक्राउ गरेको छ।
पक्राउ पर्नेमा तेह्रथुमको लालिगुराँस नगरपालिका–८ सोल्माका ३५ वर्षीय छत्रबहादुर नेपाली रहेका छन्।
जिल्ला अदालत तेह्रथुमले कर्तव्य ज्यान मुद्दामा उनलाई २० वर्ष कैद सजाय सुनाएको थियो। सजायमध्ये ९ वर्ष कैद भुक्तान गर्न बाँकी रहँदा उनी सुनसरीस्थित झुम्का कारागारमा कैद सजाय भुक्तान गरिरहेका थिए।
प्रहरीका अनुसार २०८२ साल भदौ २३ र २४ गते भएको जेन्जी आन्दोलनका क्रममा उनी झुम्का कारागारबाट फरार भएका थिए।
फरारपछि आफ्नै घरमा लुकीछिपी बसेको भन्ने गोप्य सूचनाका आधारमा इलाका प्रहरी कार्यालय बसन्तपुरबाट प्रहरी निरीक्षक रुपेश तामाङको नेतृत्वमा खटिएको प्रहरी टोलीले साउन २१ गते राति करिब २ बजे उनलाई घरबाटै पक्राउ गरेको हो।
पक्राउ परेका नेपालीलाई आवश्यक कानुनी प्रक्रिया पूरा गरी थप कारबाहीका लागि सम्बन्धित निकायमा पठाइने प्रहरीले जनाएको छ।
