मोरङको सुनवर्षीमा ४ वर्षीया बालिकाको हत्या आरोपमा एक जना पक्राउ
विराटनगर, साउन २१ — मोरङको सुनवर्षी नगरपालिका–९ डाइनिया मुस्लिम टोलकी ४ वर्षीया बालिका कायानत खातुनको हत्या आरोपमा प्रहरीले एक जनालाई पक्राउ गरेको छ।
जिल्ला प्रहरी कार्यालय मोरङका अनुसार साउन ८ गते जफारुल मियाँकी छोरी कायानत खातुन घाँसीबारीभित्र मृत अवस्थामा फेला परेकी थिइन्। घटनापछि प्रहरीले अनुसन्धान अघि बढाएको थियो।
अनुसन्धानका क्रममा सोही स्थानका ५९ वर्षीय जान महमद मन्सुरी उक्त घटनामा संलग्न रहेको खुलेपछि उनलाई साउन २० गते आफ्नै घरबाट पक्राउ गरिएको प्रहरीले जनाएको छ।
पक्राउ परेका मन्सुरीविरुद्ध कर्तव्य ज्यान कसुरमा मोरङ जिल्ला अदालतबाट पाँच दिनको म्याद थप अनुमति लिएर थप अनुसन्धान भइरहेको जिल्ला प्रहरी कार्यालय मोरङले जनाएको छ।
