झारफुकको बहानामा बालिकामाथि कुटपिट गर्ने ५९ वर्षीय पक्राउ
जाजरकोट, साउन २२ । झारफुक गर्ने बहानामा १४ वर्षीया बालिकामाथि कुटपिट गरेको आरोपमा जाजरकोट प्रहरीले एक जनालाई पक्राउ गरेको छ।
जिल्ला प्रहरी कार्यालय जाजरकोटका अनुसार बारेकोट गाउँपालिका–६ धुमास्थित सार्वजनिक सडकमा गत असार ५ गते स्थानीय ५९ वर्षीय हिरालाल चलाउनेले १४ वर्षीया बालिकालाई झारफुक गर्ने भन्दै हात–मुक्काले कुटपिट गरेका थिए। घटनासम्बन्धी भिडियो सामाजिक सञ्जालमा भाइरल भएपछि प्रहरीले अनुसन्धान अघि बढाएको हो।
प्रहरीले साउन २१ गते साँझ करिब ४ बजे चलाउनेलाई बारेकोट गाउँपालिका–६ बाट पक्राउ गरेको जनाएको छ।
पक्राउ परेका चलाउनेविरुद्ध जाजरकोट जिल्ला अदालतबाट पाँच दिनको म्याद थप अनुमति लिई थप अनुसन्धान भइरहेको जिल्ला प्रहरी कार्यालय जाजरकोटले जनाएको छ।
