जेनजी आन्दोलनका क्रममा झुम्का कारागारबाट फरार कैदी पक्राउ
सुनसरी । जेनजी आन्दोलनका क्रममा झुम्का कारागारबाट फरार भएका लागूऔषध मुद्दाका एक कैदीलाई प्रहरीले पक्राउ गरेको छ।
जिल्ला प्रहरी कार्यालय सुनसरीका अनुसार २०८३ साउन २५ गते बिहान ११ बजे वडा प्रहरी कार्यालय धरानबाट खटिएको प्रहरी टोलीले भारतको भागलपुर जिल्ला बिहान थाना घर भएका ३२ वर्षीय मो. सहजादालाई धरान उपमहानगरपालिका–७ स्थित उनको डेराबाट पक्राउ गरेको हो।
सहजादा लागूऔषध मुद्दा नं. ०८१–C१–०५१९ मा सुनसरी जिल्ला अदालत इनरुवाको २०८२ वैशाख ७ गतेको फैसलाअनुसार ३ वर्ष ६ महिना कैद र १ लाख ४० हजार रुपैयाँ जरिवाना तोकिएका व्यक्ति हुन्।
फैसलापछि झुम्का कारागारमा कैद भुक्तान गरिरहेका उनी २०८२ भदौ २४ गते जेनजी आन्दोलनका क्रममा कारागारबाट फरार भएका थिए।
पक्राउ परेका सहजादालाई आवश्यक प्रक्रिया पूरा गरी इलाका प्रहरी कार्यालय धरानमार्फत पुनः झुम्का कारागार पठाउने तयारी भइरहेको प्रहरीले जनाएको छ।
