मन्त्रिपरिषद्का तीन महत्वपूर्ण निर्णय
काठमाडौं । सरकारले प्रधानमन्त्री तथा मन्त्रिपरिषद्का सम्पूर्ण सदस्यको एक महिनाको तलब तथा पारिश्रमिक प्रधानमन्त्री दैवी प्रकोप उद्धार कोषमा जम्मा गर्ने निर्णय गरेको छ।
प्रधानमन्त्री तथा मन्त्रिपरिषद्को कार्यालयमा आज बसेको मन्त्रिपरिषद् बैठकले उक्त निर्णय गरेको हो।
बैठकले गत बुधबार नेपाल–चीन सीमा क्षेत्रअन्तर्गत रसुवागढी, भोटेकोशी नदी तथा तल्लो तटीय क्षेत्रमा आएको बाढीबाट प्रभावित जिल्लाका पीडित व्यक्ति तथा व्यावसायिक संस्थाका लागि सहुलियत र पुनःस्थापना प्याकेज तयार गर्न अर्थ मन्त्रालयलाई निर्देशन दिने निर्णयसमेत गरेको छ।
यस्तै, भारतसँग सरकार–सरकार (G2G) माध्यमबाट २५ हजार मेट्रिक टन DAP मल खरिद गर्न कृषि सामग्री कम्पनी लिमिटेडलाई सैद्धान्तिक स्वीकृति प्रदान गर्ने निर्णय बैठकले गरेको छ।
मन्त्रिपरिषद्का यी निर्णयले बाढी प्रभावितको राहत तथा पुनःस्थापना र आगामी कृषि उत्पादनका लागि आवश्यक रासायनिक मलको आपूर्तिलाई प्राथमिकता दिएको छ।
