विराटनगरबाट चोरीका पाँच मोबाइल र नगद सहित दम्पती पक्राउ
विराटनगर । मोरङको विराटनगरबाट प्रहरीले चोरीका पाँच थान मोबाइल र नगदसहित एक दम्पतीलाई पक्राउ गरेको छ।
भदौ २६ गते बिहान करिब ८ बजे विराटनगर महानगरपालिका–१५ स्थित एक नम्बर ढाँटबाट इलाका प्रहरी कार्यालय रानी र रानी (सीमा) बाट खटिएको प्रहरी टोलीले नेपालबाट भारततर्फ पैदल जाँदै गरेका दुई जनालाई शंकास्पद अवस्थामा चेकजाँच गरेको थियो।
चेकजाँचका क्रममा सुनसरीको इटहरी उपमहानगरपालिका–४ बस्ने २२ वर्षीय कृष्ण साह र उनकी २३ वर्षीया श्रीमती बबिता बुढाथोकीको साथबाट चोरीका पाँच थान मोबाइल बरामद भएको प्रहरीले जनाएको छ।
प्रहरीका अनुसार उनीहरूको साथबाट नेपाली नगद ७ हजार ४ सय ३५ रुपैयाँ र भारतीय नगद १ हजार ८ सय रुपैयाँसमेत बरामद भएको छ।
बरामद मोबाइलमा Redmi 7, Redmi A5, Samsung, Honor र Apple कम्पनीका एक–एक थान रहेका छन्।
मोबाइल तथा नगदसहित पक्राउ परेका दम्पतीलाई इलाका प्रहरी कार्यालय रानीमा ल्याई घटनाबारे थप अनुसन्धान भइरहेको प्रहरीले जनाएको छ।
