झापा, मोरङ र सुनसरीबाट लागूऔषध सहित ६ जना पक्राउ
विराटनगर । झापा, मोरङ र सुनसरीका विभिन्न स्थानबाट प्रहरीले लागूऔषध ब्राउन सुगर तथा प्रतिबन्धित औषधिसहित ६ जनालाई पक्राउ गरेको छ।
प्रहरीका अनुसार भदौ २७ गते विभिन्न स्थानमा गरिएको चेकजाँच तथा कारबाहीका क्रममा उनीहरू पक्राउ परेका हुन्।
झापामा इलाका प्रहरी कार्यालय कुमरखोद र प्रहरी चौकी टाघनडुब्बाबाट खटिएको संयुक्त प्रहरी टोलीले शिवसताक्षी नगरपालिका–६ का ५३ वर्षीय संजय अग्रवाल र सोही स्थानका १८ वर्षीय अर्जुन मल्लिकलाई ७ ग्राम १४ मिलिग्राम ब्राउन सुगरसहित पक्राउ गरेको छ।
त्यस्तै, मोरङको अस्थायी प्रहरी चौकी कुसलबजारबाट खटिएको प्रहरी टोलीले कानेपोखरी गाउँपालिका–४ का ३७ वर्षीय सुन्दर धिमाललाई १ ग्राम ९७० मिलिग्राम र पथरीशनिश्चरे नगरपालिका–८ का २९ वर्षीय अजय मगरलाई २७० मिलिग्राम ब्राउन सुगरसहित पक्राउ गरेको प्रहरीले जनाएको छ।
यसैगरी, सुनसरीको प्रहरी चौकी प्रकाशपुरबाट खटिएको टोलीले बराहक्षेत्र नगरपालिका–९ का २५ वर्षीय भजन देव रामलाई ५९० मिलिग्राम ब्राउन सुगर, ट्रमाडोल ५ ट्याब्लेट र स्पास्टिन ६ ट्याब्लेटसहित नियन्त्रणमा लिएको छ।
यस्तै, इलाका प्रहरी कार्यालय लौकहीबाट खटिएको टोलीले भारतबाट नेपालतर्फ पैदल आउँदै गरेका धादिङको बेनीघाट गाउँपालिका–१ का २८ वर्षीय राजकुमार थिङ तामाङलाई ३ ग्राम ३९० मिलिग्राम ब्राउन सुगरसहित पक्राउ गरेको छ।
पक्राउ परेका सबैमाथि थप अनुसन्धान भइरहेको प्रहरीले जनाएको छ।
