ब्राउन सुगर सहित झापा र सुनसरीबाट ४ जना पक्राउ
विराटनगर । झापा र सुनसरीबाट प्रहरीले ब्राउन सुगरसहित चार जनालाई पक्राउ गरेको छ।
भदौ २९ गते झापाको मेचीनगर नगरपालिका–६ मेचीडाँडाबाट लागूऔषध नियन्त्रण ब्युरो काँकरभिट्टा र इलाका प्रहरी कार्यालय काँकरभिट्टाको संयुक्त टोलीले बिर्तामोड नगरपालिका–८ का २८ वर्षीय विजय राजवंशीलाई पक्राउ गरेको हो। शंका लागेर चेकजाँच गर्दा उनको साथबाट ३ ग्राम १४० मिलिग्राम ब्राउन सुगर बरामद भएको प्रहरीले जनाएको छ।
त्यस्तै, वडा प्रहरी कार्यालय भद्रपुरबाट खटिएको टोलीले भारतबाट नेपालतर्फ आउँदै गरेका बिर्तामोड नगरपालिका–३ बिर्ताबजारका २२ वर्षीय कुरबान शेखलाई ३ ग्राम ६२ मिलिग्राम ब्राउन सुगरसहित पक्राउ गरेको छ।
यसैगरी, सुनसरीको बराहक्षेत्र नगरपालिका–११ मुसहरीटोलबाट इलाका प्रहरी कार्यालय महेन्द्रनगर र प्रहरी चौकी मधुवनको संयुक्त टोलीले दुई जनालाई पक्राउ गरेको छ। धरान उपमहानगरपालिका–१७ का २७ वर्षीय हेम राईले चलाएको को ३१ प ८८८५ नम्बरको स्कुटर चेकजाँच गर्दा पछाडि सवार सोही स्थानका ४४ वर्षीय जयबहादुर खड्गीको साथबाट १ ग्राम ३८ मिलिग्राम ब्राउन सुगर बरामद भएको प्रहरीले जनाएको छ।
ब्राउन सुगरसहित पक्राउ परेका चारै जनामाथि थप अनुसन्धान भइरहेको प्रहरीले जनाएको छ।
