नेपाल संवत् ११४७ र म्हः पूजाको अवसरमा प्रधानमन्त्री बालेनको शुभकामना
काठमाडौँ । प्रधानमन्त्री बालेन्द्र शाह (बालेन) ले नेपाल संवत् ११४७ तथा म्हः पूजाको अवसरमा स्वदेश तथा विदेशमा रहेका नेपालीलाई शुभकामना व्यक्त गरेका छन्।
प्रधानमन्त्री बालेनले मंगलबार सामाजिक सञ्जाल फेसबुकमार्फत शुभकामना सन्देश जारी गर्दै नेपाल संवत् नेपालको मौलिक समयचक्र र पहिचान भएको बताएका छन्।
राष्ट्रिय विभूति शङ्खधर साख्वाःले देशभरका जनतालाई ऋणमुक्त पारेर नेपाल संवत् सुरु गरेको उल्लेख गर्दै उनले यसलाई चन्द्रमामा आधारित मौलिक संवत्का रूपमा व्याख्या गरेका छन्।
म्हः पूजाको महत्त्वबारे चर्चा गर्दै प्रधानमन्त्री बालेनले आफ्नै देह र शरीरभित्रको चेतनालाई साक्षी राखेर आफैँले आफैँलाई पूजा गर्ने परम्पराले आत्मशुद्धि र चेतनाको बोध गराउने बताएका छन्। यस पर्वले नेवार समुदायमा आपसी सद्भाव, आत्मबल र पुर्ख्यौली संस्कृतिको संरक्षण गर्दै जातीय एकतालाई थप बलियो बनाउने उनको भनाइ छ।
त्यस्तै, गोवर्धन पूजा तथा हली तिहारको प्रसङ्ग उल्लेख गर्दै उनले कृषिकर्मका सहयात्री गोरुलाई पिठो, नुन र बावर खुवाउने तथा हलो, फालीलगायत कृषि औजारको पूजा गर्ने परम्पराको चर्चा गरेका छन्।
भैलो र देउसीले छरछिमेकमा आत्मीयता र सद्भाव बढाउने उल्लेख गर्दै उनले मौलिक चाडपर्वले रिसराग भुलेर सामाजिक एकता र सहिष्णुताको भावना बलियो बनाउन प्रेरित गर्ने विश्वास व्यक्त गरेका छन्।
प्रधानमन्त्री बालेनले सबैको जीवनमा सुख, शान्ति, समृद्धि र उत्तरोत्तर प्रगतिको कामनासमेत गरेका छन्।
