राष्ट्रपतिद्वारा नवनियुक्त तीन मन्त्रीलाई शपथ, देउवा सरकारका नवनियुक्त मन्त्री को कस्ता ?
राष्ट्रपति भण्डारीद्वारा नवनियुक्त तीन मन्त्रीलाई शपथ
काठमाडौँ, २६ भदौ । राष्ट्रपति विद्यादेवी भण्डारीले नवनियुक्त तीन मन्त्रीलाई पद तथा गोपनीयताको शपथ ग्रहण गराउनुभएको छ ।
शीलतनिवासस्थित राष्ट्रपति कार्यालयमा आज आयोजित विशेष समारोहमा राष्ट्रपति भण्डारीले राष्ट्रिय प्रजातन्त्र पार्टी (प्रजातान्त्रिक) का तर्फबाट सरकारका नवनियुक्त विज्ञान तथा प्रविधि मन्त्री दीपक बोहरा, वन तथा भू–संरक्षण मन्त्री विक्रम पाण्डे र उद्योग मन्त्री सुनीलबहादुर थापालाई पद तथा गोपनीयताको शपथ गराउनुभएको हो ।
समारोहमा उपराष्ट्रपति नन्दबहादुर पुन, प्रधानमन्त्री शेरबहादुर देउवा, मन्त्रीहरु, संवैधानिक अंगका प्रमुखहरु, मुख्यसचिव, सुरक्षा निकायका प्रमुखहरुको उपस्थिति रहेको छ । प्रधानमन्त्री शेरबहादुर देउवा नेतृत्वको पाँचौँपटक मन्त्रिमण्डल विस्तार भएको हो ।
===
देउवा सरकारका मन्त्री नवनियुक्त को कस्ता ?
विजय दमासे
प्रधानमन्त्री शेरबहादुर देउवाले आज सरकार विस्तार गरे । कमल थापाबाट हालैमात्र छुट्टिएको राप्रपा (प्रजातान्त्रिक)बाट देउवाले दीपक बोहोरासहितका तीन जनालाई आफ्नो सरकारमा थपेका हुन ।
उनीहरु सरकारमा थपिएसँगै वर्तमान सरकार आकारको हिसाबले हालसम्मकै जम्बो भएको टिप्पणी गरिएको छ ।
देउवाले मन्त्रीमण्डल विस्तार गर्दा निर्वाचन आयोग सहित प्रमुख प्रतिपक्ष दल एमालेले असन्तुष्टी जनाएको छ । आचारसंहिता विपरित सरकारले सरकार मन्त्रीपरिषद् विस्तार गरेको भन्दै असन्तुष्टी जनाएका हुन ।
आखिर देउवाले बनाएको जम्बो मन्त्रीमण्डलमा कस्ता मन्त्रीले जिम्मेवारी पाए त ? यो सबैलाई चासोको विषय बनेको छ । यस्ता छन्, देउवाले नियुक्त गरेका मन्त्रीहरु ।
दीपक बोहोरा
पंचायत कालदेखिनै राज्यको नीति नियम निर्माण गर्ने तहमा बस्न सफल बोहोराले यसअघि वन, आपूर्ती, श्रम लगायतका मालदार सम्हालि सकेका छन् ।
यसपाली उनले विज्ञान तथा प्रविधि मन्त्रालयको जिम्मेवारी पाएका छन् । तत्काल निर्णय गर्न सक्ने क्षमता राख्ने बोहोरा एक विवादित पात्र हुन ।
उनलाई पदीय दुरुपयोग गरी अकुत सम्पती आर्जन गर्ने व्यक्तिका रुपमा चिनिन्छ । पछिल्लो समय उनी आयल निगमको जग्गा प्रकरणसँग समेत जोडिन पुगेका छन् ।
विक्रम पाण्डे
०४७ सालदेखि राजनीति थालेका पाण्डे चितवन जिल्लाको राप्रपाका संस्थापक उपाध्यक्ष हुँदै राप्रपामा महामन्त्रीसमेत भएका व्यक्ती हुन ।
पाण्डेले सुकुम्वासी समस्या समाधान आयोगको अध्यक्ष भएर पनि काम गरिसकेका छन् भने उनले यसअघि भुमिसुधार मन्त्रालयको जिम्मेवारी सम्हालि सकेका छन् ।
स्रोतका अनुसार उनी अमेरिकाको ग्रिन कार्डधारी रहेको पनि बताइन्छ । उनी बढि पछिल्लो समय ठेक्कापट्टामा तल्लिन रहने गरेको स्रोत बताउछ । उनले वन तथा भू संरक्षणको जिम्मेवारी लिएका छन् ।
सुनीलबहादुर थापा
सुनील सूर्यबहादुर थापाका छोरा हुन् । थापा धनकुटा–२ बाट तत्कालीन राप्रपाबाट निर्वाचित भएका थिए ।
उनी पनि एक विवादास्पद पात्रका रुपमा चिनिन्छन् ।
उनलाई यतिबेला उद्योग मन्त्रालयको जिम्मेवारी दिएको छ । कमल थापा नेतृत्वको राप्रपा विभाजन गर्न उनको बढि हात रहेको बुझिन्छ ।
वाणिज्य तथा आपूर्ति मन्त्री समेत उनी यसअघि बनिसकेका छन् । उनले भ्रष्टाचार प्रकरणमा चर्चा कमाएका गोपाल खड्कालाई आयल निगममा ल्याउन ठूलो भुमिका खेलेको बताइन्छ ।
रेशम बहादुर लामा
एमाले अध्यक्ष केपी शर्मा ओली नेतृत्वको सरकारमा स्थानीय विकास सहायकमन्त्रीको जिम्मेवारी पाएका उनले यतिबेला उद्योग राज्यमन्त्रीको जिम्मेवारी पाएका छन् ।
तत्कालिन सरकारले विराज विष्टलाई पदमुक्त गरि सो ठाउँमा लामालाई नियुक्ति दिएको थियो ।
उनी काभ्रेपलाञ्चोकबाट समानुपातिक संसद हुन । साक्षर मात्रै रहेका लामा विशेषगरी ठेकदारका रुपमा चिन्नेहरु धेरै छन् । घटना र विचारबाट ।
