सगरमाथा आरोहणका क्रममा ४१ वर्षीय स्वीस नागरिकको खोंचमा खसेर मृत्यु
सोलुखुम्बु । सगरमाथा आरोहणका लागि आधार शिविरमा रहेका स्वीस नागरिक ४१ वर्षीय उली स्टेकको खोंँचमा खसेर मृत्यु भएको छ।
सगरमाथाको पहिलो शिविरमा आज उनको मृत्यु भएको प्रहरी नायब उपरीक्षक माधव बुढाथोकीले जानकारी दिए। उद्धारकर्ताको टोलीले उनको शव हिउँले ढाकिएको खोँचबाट बाहिर निकालेका छन्। शव आजै हेलिकप्टरमार्फत राजधानी ल्याईएको छ।
विश्व हिमाल आरोहणको क्षेत्रमा ‘स्वीस मेसिन’को उपमा पाएका ४१ वर्षीय आरोही उली सगरमाथा आरोहण गरी सँगै गरेको ल्होत्से हुँदै फर्किने योजनामा थिए। यसलाई आरोहणको भाषामा ‘हर्नबाइन रुट’ भनिन्छ। हिजो पहिलो शिविर नजिकै अर्को पनि एउटा पुरानो शव भेटिएको थियो।
