‘मोहनी लाग्ला है’ र ‘रेली खोला बगर’ लेखेकी चर्चित गीतकार कुसुम गजमेरको निधन
काठमाडौं, १८ जेठ वरिष्ठ संगीतकार रंजित गजमेरकी धर्मपत्नी एवं गीतकार कुसुम गजमेरको निधन भएको छ । ७२ वर्षीया गजमेरको भारतको मुम्बईमा बिहीबार विहान निधन भएको हो । उनी लामो समयदेखि कलेजोको समस्याबाट पीडित थिइन् ।
उनले कुसुमेरुमाल, लाहुरे, चिनो, बाँसुरी, दुइथोपा आँशु, अपराध, दक्षिणा, दर्पण छाँया आदि चलचित्रमा गीतहरु लेखेकी थिइन् । उनले लेखेका गीतहरु ‘रेली खोला बगर’, ‘मोहनी लाग्ला है’, ‘पिरती आफैं हुँदो रैछ’, ‘कसरी भनूँ म मनको कुरा यो’, ‘के सोचें मैले के भयो अहिले’, ‘चियाबारीमा’, ‘वीरताको चिनो वीरको सन्तान’, ‘माया के होला’ लगायत गीतहरु अत्यन्तै सफल र चर्चित छन् ।
२००२ साल असोजमा भारतको दार्जिलिङमा जन्मिएकी कुसुम चलचित्र निर्देशक तुलसी घिमिरेकी सासू पनि हुन् । उनका दुई छोरी र एक छोरा छन् ।
