ओलीको दुई तिहाई बहुमतको द’म्भ आजबाट समाप्त : उपेन्द्र यादव
काठमाडौं, ९ पुष । काठमाडौं । नेकपा अध्यक्ष केपी शर्मा ओली नेतृत्वको वर्तमान सरकारलाई दिएको समर्थन समाजवादी पार्टीले फिर्ता लिएको छ ।
सिंहदरबारस्थित आफ्नै संसदीय दलको कार्यालयमा बुधबार पत्रकार सम्मेलन गर्दै समाजवादी पार्टीका अध्यक्ष उपेन्द्र यादवले ओली सरकारलाई दिएको समर्थन फिर्ता लिएको जानकारी दिएको हो । साथै अध्यक्ष उपेन्द्र यादवले आजबाट वर्तमान सरकारको दुई तिहाई बहुमतको दम्भ समाप्त भएको बताएका छन् ।
संविधान संशोधनप्रति प्रधानमन्त्री ओली जिम्मेवार नबनेको भन्दै सरकारलाई दिएको समर्थन फिर्ता लिएको उनको भनाइ छ । सोमबार बसेको मन्त्रिपरिषद् बैठकमा समाजवादीका अध्यक्ष तथा उपप्रधान एवम् कानुनमन्त्री उपेन्द्र यादवले संविधान संशोधन प्रस्ताव प्रस्तुत गरेका थिए ।
तर, प्रधानमन्त्री ओलीले उक्त प्रस्ताव अस्वीकार गरेकाले सरकारमा बस्नु औचित्य नरहेको भन्दै समाजवादीबाट सरकारमा गएका कानुनी मन्त्री यादव र सहरी मन्त्री मोहम्मद इस्तियाक राईले मंगलबार पदबाट राजीनामा दिएका थिए ।
बुधबार आयोजित पत्रकार सम्मेलनमा यादवले बारम्बार संविधान संशोधनको कुरा उठाउँदा प्रधानमन्त्री ओलीले बेवास्ता गरेको आरोप लगाए । तराई मधेशसहितका जनताको अधिकार सुनिश्चित गर्न संविधान संशोधनको आवश्यकता रहेको बताउँदै उनले तर यसप्रति सरकार उदासिन बनेकाले समर्थन फिर्ता लिएको बताए । संविधान संशोधनको माग उठाइरहने उनको भनाइ छ ।
