५ जना युवती मिलेर ३ जनालाई निर्घात कुटपिट गर्ने थप दुई जना युवती पक्राउ
सुनसरी । सुनसरीको बराहक्षेत्र नगरपालिका–९ स्थित सप्तकोशीको किनारामा झगडा गरेको आरोपमा थप दुई युवतीलाई प्रहरीले पक्राउ गरेको छ ।
असार २९ मा मादक पदार्थ सेवन गरेर ५ जना युवती मिलेर ३ जनालाई निर्घात कुटपिट गरेका थिए । सो घटनामा संलग्न थप दुई जनालाई पक्राउ गरिएको जिप्रका सुनसरीका डिएसपी राजकुमार राईले रातोपाटीलाई बताए ।
पक्राउ पर्नेमा बराहक्षेत्र नगरपालिका–८ बस्ने १८ वर्षीय दुर्गा राई र २२ वर्षीय विनीता उराउ छन् । इलाका प्रहरी कार्यालय महेन्द्रनगरका ईन्स्पेक्टर राजेश दत्त नेतृत्वको टोलीले उनीहरूलाई पक्राउ गरेर अनुसन्धान गरिरहेको छ ।
कुटपिट भएकै दिन घटनामा संलग्न बराहक्षेत्र नगरपालिका–१० स्थित प्रकाशपुर घर भएकी १९ वर्षीय प्रिति लिम्बुलाई प्रहरीले पक्राउ गरेको थियो । कुटपिटमा संलग्न दुई जना अझै फरार छन् ।
सप्तकोशी किनारा स्थित राजाबासमा १९ वर्षीय मनिषा राई समेतलाई ‘बेइज्जत’ गरेको आरोप लगाएर निर्घात कुटपिट गरेका थिए । कुटपिट गरेको भिडियो सामाजिक सञ्जालमा भाइरल भएको छ । आरोपीतहरुले नै भिडियो बनाएर सामाजिक सञ्जालमा पोष्ट गरेको डिएसपी राईले जानकारी दिए । प्रहरीले उनीहरूविरुद्ध अभद्र व्यवहार मुद्दामा म्याद लिएर अनुसन्धान गरिरहेको छ ।-ratopati
