पीडितका श्रीमान्ले भने– देशका लागि लडे तर श्रीमतीको रक्षा गर्न सकिन
मणिपुर । मणिपुरको थौबल जिल्लामा यौन दुर्व्यवहारमा परेकी एक महिलाका पतिले आफूले देशको लागि कारगिल युद्ध लडेको तर आफूलाई रक्षा गर्न नसकेकोमा खेद व्यक्त गरेका छन् ।
जुलाई १९ मा दुई महिलालाई नग्न परेड गरी दुर्व्यवहार गरेको भिडियो सामाजिक सञ्जालमा सार्वजनिक भएको थियो । यो घटना भने मे ४ गते भएको हो ।
घटनाप्रति दुःख व्यक्त गर्दै कारगिल युद्ध लडेका असम रेजिमेन्टका सुबेदारले भने, ‘म कारगिल युद्धमा देशका लागि लडेँ । म श्रीलङ्कामा तैनाथ भारतीय शान्ति सेनाको हिस्सा थिएँ। मैले देशको रक्षा गरेँ तर मलाई अफसोस छ कि मेरो सेवा निवृत्ति पछि मैले मेरी श्रीमती र गाउँलेहरूको रक्षा गर्न सकिनँ।’
यसो भन्दै गर्दा उनका आँखा रसाएका थिए । उनले भने, ‘मैले कारगिलमा मोर्चामा लड्दा युद्ध देखेको छु । अहिले जब म सेवा निवृत्तिपछि घरमा छु । मेरो आफ्नो ठाउँ रणभूमि भन्दा खतरनाक भएको छ।
यस घटनालाई लिएर विपक्षी दलहरूले मणिपुरका मुख्यमन्त्री वीरेन सिंहको राजीनामा माग गरिरहेका छन्। महिलाका पतिको आरोप छ कि मे ४ को बिहान भीडले उक्त क्षेत्रमा धेरै घर जलाएको थियो ।
ती दुई महिलालाई नग्न पारेर गाउँमा मानिसहरूका अगाडि हिँड्न बाध्य पारिएको उनले बताए । सो क्रममा प्रहरी उपस्थित भए पनि कारबाही नगरेको उनको भनाई ।
यस्तो अवस्थामा घर जलाउने र महिलाको अपमान गर्ने सबैलाई कडा कारबाही होस् भन्ने उनको माग छ ।
यस प्रकरणमा हालसम्म पाँच जना पक्राउ परेका छन् । मणिपुर हिंसामा अहिलेसम्म झण्डै १५० जनाको मृत्यु भइसकेको छ र दर्जनौं चर्चमा आगजनी भएको छ भने ५०,००० भन्दा बढी मानिस विस्थापित भएका छन्।
