नेपालीले पड्काए ५१ करोडको चुइगम
काठमाडौं । नेपालको व्यापार घाटा वृद्धि हुँदै गएको छ । एक वर्षमा नेपालीले विदेशबाट ५१ करोडभन्दा धेरै रुपैयाँको चुइगम ल्याएर खाएका छन् । भन्सार विभागले सार्वजनिक गरेको तथ्यांकअनुसार आर्थिक वर्ष ०७९/८० मा नेपालीले एक वर्षमा ५१ करोड १७ लाख ६७ हजार रुपैयाँको चुइगम भित्रिएको छ ।
नेपालबाट एक वर्षमा चुइगम खरिद वापत ५१ करोड बढी रुपैयाँ बाहिर गएको छ । नेपालमा सबैभन्दा बढी भारतबाट ४९ करोड २१ लाख ६० हजार रुपैयाँ बराबरको चुइगम आयत भएको छ ।
त्यस्तै, टर्कीबाट १ करोड २ लाख १२ हजार, अमेरीकाबाट ९५ लाख ३३ हजार, यूकेबाट ४ लाख ३ हजार, आयरल्याडबाट ४८ हजार, जर्मनीबाट ३२ हजार चाइनाबाट १२ र अन्य विभिन्न देशहरुबाट १६ लाख ४ हजार रुपैयाँको चुइगम भित्रिएको छ ।
गत आर्थिक वर्ष २०७९/८० मा १४ खर्ब ५४ अर्ब ५९ करोड रूपैयाँभन्दा धेरै नेपालको वैदेशिक व्यापार घाटा भएको हो । अघिल्लो आर्थिक वर्षमा ४५ करोडभन्दा धेरैको चुइगम आयात भएको देखिन्छ ।
न त छाक टर्ने, न त पेट भरिने । अनावश्यक वस्तुमा समेत ठूलो मात्रामा पैसा नेपालबाट विदेश जाने गरेको छ । स्वास्थ्यलाई फाइदा गर्ने भए त ठीकै पनि हो । कुनै पनि हिसाबले पनि अर्थ नभएको वस्तु आयात गरेर ठूलो मेहनत गरेर जम्मा पारेको विदेशी मुद्रा खर्च गर्नुपरेको छ ।
अनावश्यक र फजुल खर्चमा नेपाली कति अगाडि छन् भन्ने कुराको खास उदाहरण हो चुइगम आयातको तथ्यांक । न औषधि नै हुने, न त अत्यावश्यक वस्तु । न त मुलुकमा नै उत्पादन हुन्छ ।
मुलुकको आर्थिक अवस्थाका बारेमा प्रायः सबैमा चेतना नभएको पनि होइन । तर पनि यस्ता अनावश्यक र विलासिताका वस्तुको आयातमा करोडौं रकम बाहिरिरहेको तथ्यांक समयसमयमा सार्वजनिक हुने गरेको छ ।
