ट्रिपरको ठक्करबाट एकजनाको युवकको मृत्यु
रामेछाप । रामेछापको गोकुलगंगा गाउँपालिकामा ट्रिपरको ठक्करबाट एक युवककोे मृत्यु भएको छ ।
गोकुलगंगा गाउँपालिका वडा नम्बर २ ठोसे बजारस्थित ग २ ख ०१७८ नम्बरको ट्रिपरले बागमती प्रदेश ०२–०२१ प ०२२६ नम्बरको मोटरसाइकलाई ठक्कर दिँदा मोटरसाइकल चालक जिरी नगरपालिका वडा नम्बर ८ स्थित पुरानो गाउँका २९ वर्षीय मिलन खत्रीको मृत्यु भएको हो ।
ट्रिपरलाई ओभरटेक गर्ने क्रममा ट्रिपरमा ठोक्किँदा मोटरसाइकल चालक खत्री गम्भीर घाइते भएका थिए । घटनास्थलबाट उद्धारगरी जिरी अस्पताल लगिएकोमा सामान्य उपचारपछि थप उपचारका लागि काठमाडौं लैजाँदै गर्दा उनको बाटोमै मृत्यु भएको जिल्ला प्रहरी कार्यालय रामेछापका प्रबक्ता प्रहरी निरिक्षक रञ्जन गिरीले जानकारी दिए ।
ठक्कर दिने ट्रिपर र चालक पूर्व नवलपरासीका ३५ वर्षीय राजेश खनाललाई प्रहरी चौकी ठोसेले नियन्त्रणमा लिएको छ । जिरीबाट ठोसेतर्फ सिमेन्ट लिएर जाँदै गरेको ट्रिपरले सोही दिशातर्फ जाँदै गरेको मोटरसाइकललाई ठक्कर दिएको थियो ।
